Шығыстағы қалалар мен аудандарға қарасты бірқатар ауылдарға көктемдегі қарғын судан қауіп бар. Мәселен, Алтай ауданындағы 12 елді мекеннің тұрғындары көктемгі су тасқынынан зардап шегуі мүмкін.
Биылғы шамадан тыс көп жауған қар осылай деуімізге себеп болып отыр. Өкінішке қарай, Алтай қаласы мен Путинцево, Быково, Парыгино, Малеевск, Соловьево, Чапаево, Снегирево, Баяновск, Первороссийское ауылдарын, сондай-ақ Зубовка мен Тұрғысын кенттерін су басу қаупі бар.
– Аудандағы табиғи апаттың алдын алу мақсатында тиісті жұмыстар атқарылуда. Күні бүгінге дейін жауапты сала мамандары кәріз құдықтарын, өзен мен арықтардың арналарын тазартты. Біз су тасқыны болған жағдайда тұрғындар мен жануарларды қауіпсіз аймаққа эвакуациялаудың сызбасын жасап қойдық, – деді аудан әкімі аппараты аумақтық қорғанысты қалыптастыру басқармасының арнайы тобының жетекшісі Амангелді Тымбаев.
Биыл аудандағы Богатырев су бөгеті мен Хамир өзенінің маңайын бекіту жұмыстары жүргізіледі. Бұдан бөлек, биыл жауапты сала мамандары мұз жару жұмыстарына 45 миллион теңге бөлуді сұрап, өтінім бермек. Мұндағы басты мақсат – көктемгі су тасқынының алдын алу.
– Биыл Соловьево ауылындағы Березовка өзенінің арнасы мен Зубовка кентін, Алтай қаласындағы саяжай аумағы мен Быково ауылындағы тұрғын үйлерді су шайып кетуден сақтап қалу үшін тиісті жұмыстар атқарылады, – деді Амангелді Тымбаев.
Атап өтерлігі, Алтай ауданы таулы өңірде орналасқандықтан, бұған дейін де бірнеше рет көктемгі тасқынның зардабын айтарлықтай тартқан аудан. Соған орай, биыл да әзірлікті ерте бастан қолға алған жайы бар.
Көктемгі су тасқыны қаупі тек Алтай ауданында ғана байқалып отырған жоқ. Сонымен бірге облыс орталығына жақын Глубокое ауданында да қауіп бар. Сол үшін жергілікті әкімдік қазірден тасқынға тосқын қамын жасауда. Атап айтқанда, осыған дейін сегіз елді мекенде өзендердің сағаларын тазарту, су өткізгіш каналдарды тереңдету, су өткізгіш трубаларды орнату және көпірлерді жөндеу жұмыстары атқарылған.
– «Қазгидрометтің» ресми мәліметтерімен бекітілгендей, аудан аумағында қар мөлшері жылдағыдан 3,5 есе артық түсіп отыр. Соған байланысты аудандағы Секисовка, Тарханка, Бобровка, Алтай, Веселовка, Быструха, Черемшанка секілді жеті елді мекенде көктемгі тасқынның алдын алу шаралары қабылдануда, – дейді Глубокое ауданының әкімі Қалихан Байғонысов.
Сондай-ақ тасқын қаупі өңірдегі Шемонайха, Бородулиха, Бесқарағай, Аягөз, Қатонқарағай аудандарында да бар. Облыстық төтенше жағдайлар департаментінің мамандары биыл аймақта қардың қалың түсуіне байланысты шығысқазақстандықтарға су тасқынынан барынша абай болып, ерте бастан қам жасауды ескертеді.
Бұдан бөлек облыс орталығы Өскемен және Семей мен Риддер қалалары да қауіпті аймақтар қатарында. Сондықтан облыстағы төтенше жағдайлар мен коммуналдық саладағы мамандардың және тиісті техникалардың дайындығы күн сайын пысықталуда.
Дәурен АЛЛАБЕРГЕНҰЛЫ,Шығыс Қазақстан
