Елімізде коронавирус инфекциясы таралуына байланысты төтенше жағдай енгізілгелі алматылық БАҚ өкілдерін тұрақты мекені жоқ жандардың жайы алаңдатқан. Алматы қаласы әкімдігінің баспасөз қызметі үйсіз-күйсіз жүрген жандардың Әлеуметтік бейімдеу орталығына оқшауланғанын хабарлаған. Ол жерде 152 тұрғын барын, олар үшін Көксай кентінде арнайы ғимарат бөлінгенін, белгілі тұрағы жоқ азаматтар бұл жерді карантин біткенге дейін паналай алатынын айтқан. Көпшіліктің көңілін жайландыру үшін журналистер бұл ақпаратты басылымдарда жариялаған. Соңғы деректер бойынша, Алматыдағы қаңғыбастардың біразын Алматы облысы Талғар ауданына қарасты Бесағаш ауылына апарып тастағаны белгілі болды. Тұрғындардың айтуынша, қаладан Бесағаш ауылына белгілі тұрағы жоқ 30-40 азамат келген. Барлығын жол бойына лақтырып кеткен. Куәгерлер олардың «Газель» машинасымен жеткізілгенін айтады. Олар осы күнге дейін негізінен қаладағы бұрынғы «Саяхат» автовокзалы маңайында жүрген. «Бомждарды тасушылар үш рейс жасады. Мұнда бой тасалайтын, тығылатын жер жоқ. Олар түнімен жаңбыр астында ұйықтап шықты. Қазір оларға тамақ берудің жолдарын қарастырып жатырмыз. Бүгінде бүкіл елде төтенше жағдай жарияланып, карантин режимі енгізілді. Ешкім үйден шықпай, бетпердемен қымтанып, барлық тазалық шарасын қолданып жүрміз. Ал Алматы басшылығының ай-шайға қарамай, бомждарды лақтырып кеткенін түсіне алмай отырмыз. Олардың вирус таратушы болмасына кім кепіл? Егер коронавирустың таралмауына шынымен мүдделі болса, бомждарды жинап, арнайы орында неге ұстамайды? Осылай ауыл шетіне лақтырып кеткеннен мәселе шешіле ме? Халыққа күн сайын үйде отыруды тапсырып жатыр, ал нағыз вирус тасымалдаушы болуы мүмкін бомждарды ауылға тасуда. Логика қайда?», – дейді атын атамауды сұраған тұрғынның бірі.
Алматы қаласы Бейімдеу орталығының директоры Харсан Таранов қала әкімшілігінен Көксай ауылында 20 төсек бөлінгенін растап отыр. Ақыры арнайы бөлінген орын бар екен, неге үйсіз-күйсіз жүрген жандар облыс аумағына жеткізілген? Бізге беймәлім тұсы – осы.
