Талапты бұзғандар жауапқа тартылуда
Облыс бойынша дезинфекция орталығының мамандары аудандағы залалсыздандыру жұмыстарымен айналысатын қызметкерлерге онлайн режимде дезинфекция жұмысының нұсқаулықтарымен таныстырған. Орталықтың өкілі Индира Әубәкірованың айтуынша, қазір онда 109 маман бар, аудандағы өзге де мамандар білікті болып, залалсыздандыру жұмыстарын сапалы атқаруы қажет. Жалпы, облыс бойынша коронавирус инфекциясымен ауырған науқастарды жатқызу үшін 150 төсек-орын дайын. Пандемиялық індетке ұқсас белгілері бар науқастарды жатқызып, диагноздарын анықтау мақсатында 510 төсек-орынға провизорлық госпиталь қарастырылған. Одан бөлек, барлық аудандар мен қалалардағы инфекциялық аурулар бөлімдері дайын. Қарым-қатынаста болғандарды оқшаулау үшін облыс аумағына 955 төсек-орынға орталық ашылған. Облыс аумағында барлық азаматтар медициналық бетперде киіп жүруі керек. Дүкендер мен қоғамдық орындарда бетпердесіз жүруге тыйым салынды. Онда арнайы залалсыздандыру құралдары орнатылуы тиіс. Тұрғындар үйден тек қана азық-түлік, дәрі-дәрмек алуға немесе жұмысқа бару үшін шығуы керек. Отбасылық мерекелер мен жиын-той өткізуге қатаң тыйым салынған.
6 мыңға жуық азаматқа – 42 500 теңге
Бүгінгі таңда мемлекеттік сақтандыру қорынан төтенше жағдайға байланысты жұмысын жоғалтқан азаматтарға әлеуметтік төлем қарастырылған. Түркістан облысы жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаеваның айтуынша, бұл төлемге шағын және орта кәсіп субъектілері, жеке жұмыс істейтін азаматтар мен бірыңғай жиынтық төлем төлеуші азаматтар қол жеткізе алады. Қазіргі таңда барлық аудан, қалаларда жұмыс штабы құрылған. Облыста 6 мыңға жуық азаматқа 42 500 теңге төлем тағайындалған. Түркістан облысында 109 бірыңғай байланыс орталығы 24/7 форматта тәулік бойы қоңырау қабылдауда. 109 Call-орталығы қазіргі уақытқа дейін облыс тұрғындарынан 2 000-нан аса қоңырау қабылдаған.Онлайн оқыту жүйесі алынып тасталды
Түркістан облысында шалғай ауылдарда интернет желісі сапасының тиісті деңгейде болмауына байланысты онлайн оқыту жүйесі алынып тасталды. Қашықтан білім беру процесі «Балапан», «Еларна», «Оңтүстік» телеарналары, «Қазақ радиосы» және «Қазпошта» АҚ-ның көмегі арқылы жүзеге асырылады. Облыстық Адами әлеуетті дамыту басқармасының басшысы Рақымбек Жолаевтың сөзінше, бүгінгі күні білім берудің жаңа жобасына байланысты дайындық жұмысы жүргізілуде. «Қазіргі таңда облыстағы 909 орта білім беру ұйымдарында 488 182 оқушы білім алып келеді. Оның 80% ауылдық жерде оқиды. Үй жағдайында интернет желісіне мүмкіндігі бар оқушылар саны 124 мың оқушыны құрайды, ал 121 мың оқушының компьютерлік техникасы жоқ. Осы ретте ұстаздар мен оқушыларды тиісті компьютерлік техникамен қамтамасыз ету үшін мектептегі 29 мың компьютер мен ноутбуктер өз жауапкершіліктері негізінде таратылып берілді. Жалпы, 9 мыңға жуық оқытушының компьютерлік техникасы және 11 мың оқытушыда интернет желісін пайдалану мүмкіндігі жоқ болатын», – деді Рақымбек Қуатбекұлы. Жалпы, облыстағы 429 943 оқушы республикалық «Балапан», «Еларна», «Қазақ радиосы», «Оңтүстік» телеарналары және «Қазпошта» АҚ арқылы қашықтан оқитын болады. Телеарна көруге мүмкіндігі жоқ шалғай елді мекендегі 320-дан астам оқушы «Қазақ радиосы» және «Қазпошта» АҚ көмегін пайдаланады. Ал Арыс қаласындағы 9 мектеп сабақтарын бұрынғысынша дәстүрлі түрде өте береді. Тауарлар мен қызметтердің сапасы бөлімінің рұқсаты алынған.Құрылыс жұмысы тоқтамайды
Түркістан облысында құрылыс нысанындағы жұмыстар жалғаса береді. Облыс әкімінің бірінші орынбасары Қосман Айтмұхаметовтің сөзінше, бүгінде Түркістан қаласындағы 35 нысанда 3 261 құрылысшы бір ауысымда жұмыс істейді. «Төтенше жағдайға байланысты облыстың бас санитар дәрігері қосымша шектеу белгіледі. Алайда бұл құрылыс жұмысына ешқандай кедергі келтірмейді. Барлық жұмысшыларға іс барысында тиісті сақтық шараларын қатаң түрде сақтап жүру туралы талап қойылып отыр», – деді Қ.Қайыртайұлы. ҰЭМ Табиғи монополияларды реттеу комитетінің Түркістан облысы бойынша департаменті табиғи монополиялар субъектілеріне төтенше жағдай кезінде тұрғындардың қарызының болғанына қарамастан тұтынушыларға көрсетілетін тұрғын үй-коммуналдық шаруашылық саласындағы қызметтерді көрсету жалғаса береді. Атап айтқанда, жарық, су, газ беру қызметіне қарызы бар адамдардың үйіне көрсетілетін коммуналдық қызмет тоқтатылмайды.Тельман БЕЙСЕН, Түркістан облысы