Мәжіліс төрағасы Нұрлан Нығматулин Қазақстанға алғаш рет ресми сапармен келген Хорватия Республикасы премьер-министрінің орынбасары, Сыртқы және еуропалық істер министрі Мария Пейчинович – Буричпен кездесті.
Тараптар екіжақты қарым-қатынасты дамытудың маңызды мәселелерін талқылады. Н.Нығматулин Хорватия Қазақстанның Оңтүстік – Шығыс Еуропадағы маңызды әрі әлеуетті әріптесі екенін алға тартып, біздің еліміз Қазақстанның Тұңғыш Президенті, Елбасы Нұрсұлтан Назарбаев негізін қалаған ынтымақтастықты одан ары тереңдетуге және кеңейтуге ынталы екенін айтты. Биыл қос мемлекет арасында дипломатиялық қатынастың орнағанына 27 жыл толатынын еске салған Мәжіліс төрағасы осы уақыттар ішінде, саяси және экономикалық тығыз байланысқа қол жеткізілгенін атап өтті.Өз кезегінде Мария Пейчинович – Бурич Қазақстан мен оның халқына деген құрметінің ерекше екенін және Тұңғыш Президент Нұрсұлтан Назарбаевтың даму, тұрақтылық, бірлікті арқау ете отырып, еліне жасаған ерен ерлігін аса жоғары бағалайтынын жеткізді.
Мәжіліс спикері екі ел арасындағы парламентаралық өзара іс-қимылды күшейтудің маңызын тілге тиек етті. Сонымен бірге, заңнамалық тәжірибені меңгеру және етене байланыс орнату мақсатында ынтымақтастық жөніндегі топтар деңгейінде сапарлар алмасу тәжірибесін енгізудің қажеттілігіне тоқталды. Кездесуде Мәжіліс төрағасы 23-24 қыркүйекте Нұр-Сұлтан қаласында өтетін Еуропа және Азия елдері Парламенттері спикерлерінің IV кеңесіне назар аудара келіп, маңызды жиын парламентаралық байланыстарды, сонымен бірге, екіжақты қатынастарды нығайтуға кең жол ашатынын айтты.