Ақмола облысының орталығы Көкшетау қаласында ұйытқыған жел екі ғимараттың шатырын жұлып кетті.
Деректерге қарағанда, 7 сәуірде Көкшетауда жылдамдығы секундына 28 метр болатын күшті жел соққан. Соның салдарынан қаланың Әуелбеков көшесінде орналасқан 5 қабатты үйдің шатыры жұлынған. Ұшып кеткен шатырдың жалпы аумағы 700 шаршы метрді құрады. Жараланғандар мен зардап шеккендер жоқ. Төтенше жағдай қызметі оқиға орнына жетіп, төңіректі қирандылардан аршу жұмысына бірден кірісті. Бірақ шатыры жұлынған екінші нысан жайлы жергілікті Төтенше жағдайлар департаменті ақпарат таратпады.
Теріскейде ауа райының күрт құбылуы тек Көкшетауды ғана емес, аймақтағы тағы бірнеше қаланы әбігерге салып қойды. Атап айтқанда, Қостанай облысының 3 қаласы күшті желдің кесірінен біраз уақыт электр жарығынсыз қалды. Қостанай, Рудный, Лисаковск қалаларында күшті жел ағаштарды құлатқандықтан электр желілеріне зақым келді. Сөйтіп, қалалардың бірқатар аудандары жарықсыз қалды. Қазір тиісті құрылымдар табиғи апаттың зардабын жойып жатыр. Ал ауа райын болжаушылар Көкшетау, Нұр-Сұлтан қалаларында қар жауатынын болжауда. Қостанайға қар жауып та қойды.
