Елімізде аң-құстардың санын сақтап және оларды көбейту мақсатында Ауыл шаруашылығы министрлігі Орман шаруашылығы және жануарлар дүниесі комитетінің 2016 жылғы 24 қарашадағы №265 бұйрығымен (көктемгі) 16 ақпаннан 14 маусымды қоса есептегенде аң аулауға тыйым салынды. Өздеріңіз білетіндей, көктем мезгілі – су құстарының жұптасып, жұмыртқа салатын уақыты. Осыған байланысты, көктем мезгілінде құстардың санын сақтап, көбеюіне ықпал етуіміз қажет.
2019 жылы көктемгі аңшылық маусымның тыйым салуын насихаттау, облыс көлемінде жабайы жануарларды қорғау, күзету мақсатында Алматы облыстық орман шаруашылығы және жануарлар дүниесі аумақтық инспекция қызметкерлері, «Охотзоопром» мекемесі, полиция қызметкерлері және табиғат пайдаланушылар жұмыла жұмыс атқарады. Десе де, табиғат заңнамасын бұзушы азаматтар табылады. Алайда көктемгі аңшылық маусымына тыйым салу оң нәтиже беруде.
Алматы облыстық орман шаруашылығы және жануарлар дүниесі аумақтық инспекция қызметкерлері облыс аумағында жабайы жануарлар дүниесін қору, күзету және көктемгі аңшылық маусымына тыйым салынуды насихаттау жұмысын жүйелі түрде жүргізуде. Атқарылған шаралар нәтижесінде облыс аумағында 2017-2018 жылдармен салыстырсақ, көктем мезгілінде табиғат заңнамасын бұзу фактілері 30%-ға азайып отыр.
Табиғат аясында демалушылар үшін тағы ескерте кетейік, көктемгі аңшылық маусымға тыйым салынды. Табиғат заңнамасын бұзбауға және табиғатымызды аялауға, келешек ұрпағымызға сақтап қалуға шақырамыз.
Нұрлан ОРМАНБЕКОВ,
Алматы облыстық орман шаруашылығы және жануарлар дүниесі аумақтық инспекциясының бас маманы