Елордада «Қазақстан аруы – 2019» байқауы өтті. Күні кеше Қазақстанның һас сұлулары бәстескен бұл байқаудың нүктесі қойылып, халық Қазақстанның ең сұлу аруын таңдады.
Аталған сұлулық байқауы осымен 22-мәрте дәстүрлі түрде өткізіліп отыр. Биыл байқау Жастар жылына тұспа-тұс келіп, соған бағытталып өткізілді. Айта кетерлігі, байқаудың форматы да жаңарған. Қазақстан аруы – 2019 байқауының басты ерекшелігі – еліміздің туризм саласын дамытуға бағытталуында. Себебі, байқау барысында әр өңірдің сұлуы туған жерінің кереметін, табиғат аясының көркемдігін бейнетаныстырылым арқылы үйлесімді баяндап, оны қалың жұртқа паш етті.Әсемдік пен талғамның символы іспеттес байқауда Қазақстанның түкпір-түкпірінен кіл мықты мен хор қызындай сұлу 32 бойжеткен іріктеліп, ақтық мәреде олар өзара сайысқа түсті. Аруларға өз ісінің мамандары, сән мен сахнаның майталмандары қазылық етті. Нәтижесінде, олар Топ-5-тің қатарына: Диана Әбішева (Алматы), Сәния Мерғалиева (Нұр-Сұлтан), Мадина Батық (Павлодар), Надежда Недосекова (Семей), Балжанат Анас (Шымкент) есімді аруларды лайық деп таныды. Ал ары қарайғы шешім, сайыстың нүктесін қоюды халықтың еншісіне тапсырды. Яғни, Қазақ елі онлайн дауыс беру мен СМС-хабарлама арқылы таңдау жасап, Қазақстанның ең сұлу аруын ашық түрде таңдады.
Дауыс беру қорытындысы бойынша, «Қазақстан аруы – 2019» атағына Керекулік Мадина Батық, үшінші вице-мисс Сәния Мерғалиева, екінші вице-мисс Надежда Недосекова және бірінші вице-мисс аталымына Диана Әбішева лайық деп танылды.
Алдағы уақытта Мадина «Әлем аруы – 2019» байқауында Қазақ елінің намысын қорғап, әлемдік сахнада тағы бір мәрте бақ сынайды.
М.Батық С.Торайғыров атындағы Павлодар мемлекеттік университетінде туризм мамандығы бойынша білім алып жүр.
Інжу БАЛТАБЕКҚЫЗЫ