«Сіздің шотыңызға Birgemiz қорынан 50 000 теңге түсті. #BizBirgemiz #Елбасы #Nur Otan». Осындай хабарлама әлеуметтік жағынан әлсіз топтарға жататын қазақстандық отбасыларға жолдануда.
Елбасы – Nur Otan партиясының Төрағасы Н.Назарбаевтың бастамасымен құрылған Birgemiz республикалық қоғамдық қоры Қамқоршылық кеңесінің өткен аптадағы отырысында коронавируспен күрес жағдайында халықтың әлеуметтік әлсіз санатына кіретін мұқтаж жандарға 50 мың теңгеден бөлу туралы шешім қабылданды.
Бастапқыда қор қаражатын 100 мың мұқтаж азаматқа тарату жоспарланды. Әйтсе де, өңірлерден түскен өтініштер саны айтарлықтай өсіп, партияның онлайн ресурстарына көмек сұрап хабарласқан азаматтардың саны екі есеге артты. Сондықтан Елбасының тапсырмасы бойынша Мемлекет басшысының бастамасымен қолға алынған #BizBirgemiz акциясының аясында, бірінші кезеңде қаржылық қолдауды 150 мыңнан аса мұқтаж азаматқа көрсету туралы шешім қабылданды.
Birgemiz қоғамдық қорының төрағасы Руслан Сакеевтің мәліметінше, қазіргі таңда 50 мың теңге материалдық көмекті 50 мыңнан аса адам алып үлгерді.
– 7,6 миллиард теңге қаражат аймақтық қорлардың есебіне түсті. Ақша сол жақтан көмек алушылардың банктік есепшоттарына аударылады. Бұлар негізінен карантин қиындықтарын көбірек шегіп жатқан 23 ірі қаланың тұрғындары. Әкімдер мен әлеуметтік қорғау органдары ұсынған көмек алушылар тізімдерінде табыс деңгейі ең төмен әлеуметтік әлсіз топтардан құралған азаматтар қамтылған. Оның ішінде аз қамтылған және көпбалалы отбасылар, мұқтаж мүгедек жандар, мүмкіндігі шектеулі бала тәрбиелеп отырған отбасылар, ең төменгі зейнетақы алатын және әлеуметтік жағынан әлсіз топқа кіретін зейнеткерлер, жетім балалар, ҰОС-ның ардагерлері мен оларға теңестірілген тыл еңбеккерлері бар, – деді Руслан Сәкеев.
Сонымен қатар ол материалдық көмекті екінші деңгейдегі банктер арқылы жеке тұлғалардың карточкаларына немесе ағымдағы есепшоттарына аудару кезінде одан комиссия алынбайтынын айтты. Сондай-ақ бұл қаражаттың несие бойынша қарызы бар азаматтардың берешегін өтеу үшін ұсталып қалмауы да пысықталған.
– Бүгін ерекше қажеттілігі бар балаларды тәрбиелеп отырған отбасылар Birgemiz қоғамдық қорынан 50 000 теңге көмек ала бастады. Бұл Елбасы мен Nur Otan партиясының арқасында жүзеге асып отыр. Әлеуметтік саясатты дұрыс бағытта жүргізіп, ардагерлерді, ерекше қажеттілігі бар балаларды және тұрғындардың әлеуметтік әлсіз топтарын ешқашан қамқорлықсыз қалдырмайтындарыңыз үшін алғысымызды білдіреміз. Осындай қиын уақытта әрбірінің есебіне 50 000 теңгеден аударып, мүгедек балаларды да назардан тыс қалдырмадыңыздар, – деп жазды «Орда» Нұр-Сұлтан қаласындағы аутизммен ауыратын балалардың ата-аналарының бірлестігі» қоғамдық ұйымының жетекшісі Салтанат Есмағамбетова өзінің Facebook-тегі парақшасында.
– Бүгін менің карточкама Birgemiz қорынан 50 мың теңге түскені туралы хабарламаны алып қуанып қалдым. Елбасыға және Nur Otan партиясына қазіргідей қиын кезеңде бізді елеп-ескергені үшін рақмет айтамын. Есітуім бойынша, мұндай көмекті аз қамтылған көпбалалы отбасылар, I топ мүгедектері, жетім балалар алады. Қала тұрғындарынан карантин уақытында барлық қауіпсіздік шараларын қатаң сақтап, аса қажет болмаған жағдайда үйден шықпауларын өтінемін. Біз бірге барлық сынаққа төтеп бере аламыз, – деді Алматы қаласының тұрғыны, үш баланың анасы Әсел Омарова.
Жалпы Birgemiz қоғамдық қорының есепшотына 14 млрд теңгеге жуық қаржы түсті. Жуық арада 50 мың теңге көлеміндегі біржолғы төлемді індет жұқтырғандардың 70%-ға жуығы шоғырланған Нұр-Сұлтан және Алматы қалаларының 2 мыңнан астам дәрігерлері де алады. Сондай-ақ «СҚ-Фармация» үкіметтік операторымен Нұр-Сұлтан, Алматы және Шымкент қалалары тұрғындарының әлсіз топтарына тегін тарату үшін 5 миллион маска сатып алу туралы шартқа қол қойылды. Жиналған қаражат және өңірлер бойынша бөлінген көмек туралы ақпаратты бақылап отыру үшін қор birgemiz2020.kz ресми сайтын ашты.
