Алматы қаласындағы Ы.Алтынсарин атындағы №159 гимназияда Nur Otan партиясының парламенттік фракциясы мүшелерінің қатысуымен партияның 2030 жылға дейінгі бағдарламасының – «Әрбір адам үшін қолжетімді болашақ білімі» атты екінші мақсатының жүзеге асырылуы бойынша дөңгелек үстел өтті.
Басқосуға Мәжіліс төрағасының орынбасары, Nur Otan партиясы фракциясының жетекшісі Гүлмира Исимбаева,
Nur Otan партиясының депутаттық фракциясының мүшесі Гүлнәр Ихсанова, Nur Otan партиясы Алматы қалалық филиалы төрағасының бірінші орынбасары Станислав Канкуров, Алматы қалалық Білім басқармасының жетекшісі Гүлнар Ходжабергенова және орта білім мекемелерінің директорлары мен оқу ісінің меңгерушілері қатысты.
Мәжіліс төрағасының орынбасары Гүлнәр Исимбаеваның айтуы бойынша, партия бағдарламасының екінші мақсаты әрбір адам үшін қолжетімді, болашақ білімді ұйымдастыруды – қазақстандықтардың инновациялық жаңа буынын дайындауды, білім саласына ең озық мамандарды тарту, білім жүйесін дамытуды көздейді.
– Жаңа ұрпақ өкілдері әлемнің технологиялық жағынан озық үлгідегі білім мен тәрбие алған замандастарымен терезесі тең болуын ойластыруымыз қажет. Nur Otan партиясының кезекті XVIII съезінде Елбасы партия алдындағы осы бағытта атқарылар стратегиялық тапсырмалар жүйесін белгілеп берді. Тұңғыш Президент Н.Назарбаев бұдан басқа да өзекті мәселелерді көтере отырып, жалпы білім жүйесін жаңғыртуды, үш тілде оқытуды, бүгінгі оқу процесіне жаңа ақпараттық технологияны енгізуді, қолжетімді білім алуды қамтамасыз етуді тапсырды», – деп атап өтті Г.Исимбаева.
Депутаттың айтуы бойынша, бүгінде Nur Otan партиясы еліміздегі әрбір мектепте IT-сыныптар ашуға, шәкірттерді компьютерлік бағдарламалар жасауға ынталандыруға, олардың бойындағы интеллектуалды таланты мен қасиеттерді ашуға білім мекемелері арқылы барлық мүмкіндіктерді жасап отыр.
– Біз бүгін осыған орай, өздеріңізбен ақылдаса отырып, тағы да маңызды ұсыныстарды есту үшін бас қосып отырмыз. Сіздер оқушылармен тікелей жұмыс істейтін тұлғасыздар. Сондықтан барлық өтініштеріңіз бен лайықты ұсыныстарыңызды тыңдап, жинақтау үшін ұстаздар қауымын әдейі шақырып отырмыз, – деді Г.Исимбаева.
Дөңгелек үстел барысында алматылық ұстаздар өздерін толғандырып жүрген жаңа оқу бағдарламасының толықтыратын олқы тұстары туралы, үш тілділікті енгізу, мектеп оқушыларының интеллектуалды ой-өрісін өсіруге қажетті методикалық-әдістемелік оқу құралдарының сапасын жақсарту және басқа да білімге қатысты ой-пікірлерін ортаға салды.
Жиын қорытындысында білім саласына байланысты бірқатар нақты ұсыныс жасалынды және олар тиісті мемлекеттік органдарға назарға алу үшін жолданатын болады.
Ш.ЕРНИЯЗ