Әрбір азаматқа, соның ішінде оқушылар мен зейнеткерлерге берілетін карта тегін болмақ. Әмбебап картаны енгізу Еңбек және халықты әлеуметтік қорғау министрлігі мен «Еңбек ресурстарын дамыту орталығы» АҚ жүзеге асыратын «Қазақстан азаматының әлеуметтік ID» жобасы аясында жүргізіледі.
Жоба Ақтөбе қаласындағы сынақтан сәтті өтті. Енді оны еліміздің барлық өңірінде енгізу басталады. Картаны жылдың соңына дейін таратып біту жоспарланған.
ID картаны барлық қазақстандық ала алады және ол тегін. Бірінші кезекте олар зейнеткерлерге, мемлекеттік жәрдемақының барлық түрін алушыларға, сондай-ақ оқушыларға беріледі. Карта берумен «Қазпошта» АҚ айналысады.
Әмбебап картада бірқатар мемлекеттік қызметтер біріктіріледі: зейнетақы мен жәрдемақы алу, қоғамдық көлікте жол жүру ақысын төлеу, сауда, медициналық және басқа да желілердегі тауарлар мен қызметтер үшін есеп айырысуға болады. Бұдан бөлек, жол жүруге 50% жеңілдік, шипажайда демалуға 100% өтемақы алу мүмкіндігі бар.
Бұл ретте картаға «мақсатты бақылау» деп аталатын жүйе енгізілмек. Мемлекеттің заттай жеңілдіктердің орнына ақшалай берілетін қаражаттың (мысалы, балалар тағамы, қалалық көлікте жүру) басқа мақсаттарға жұмсалмауын қадағалауға қажет.
«Әртүрлі нұсқалар қарастырылды, соның ішінде NFС технологиясы бар QR-кодтар мен смартфондарды пайдалану болды. Мұндай шешімдер белгілі бір қиындыққа байланысты қабылданбады. Біріншіден, көптеген зейнет жасындағы азаматтар смарт-құрылғыларды толық қолдана алмайды. Екіншіден, барлық өңірдің тұрғындары интернетпен қамтылмаған. Сондықтан ID картаны – онлайн және офлайн пайдалана алу үшін пластикалық карта түрінде шығару туралы шешім қабылданды. Барлық азаматтар оны қалай пайдалану керегін біледі», – дейді «Еңбек ресурстарын дамыту орталығы» АҚ мүгедектікті белгілеу және әлеуметтік қызметтерді көрсету бойынша АЖ дамыту және сүйемелдеу департаменті директорының орынбасары Әлішер Елубаев.
