Біз осы күнге дейін косметикалық өнімдерді негізінен шет мемлекеттерден алып келдік. Енді осы олқылықтың орны толатын түрі бар. Отандық косметология саласында жиырма жылдан бері үздіксіз еңбек етіп, тәжірибе жинаған белгілі косметолог Гүлшаш Әубәкірқызы өз косметикалық өнімдерін нарыққа шығарды. Өнімдерді көпшілікке таныстыру рәсіміне өнер жұлдыздары мен белгілі тұлғалар қатысты.
Бұл өнімдердің басты ерекшелігі – тек қана табиғи қоспалардан тұратыны. Қазір қыз-келіншектеріміз бет күтіміне аса мән береді. Сұлулық салондарында түрлі қызмет түрлері ұсынылады. Тіпті пышаққа түсіп, ботокс сияқты түрлі әдістерді қолданады. Өкінішке қарай, оның бәрі сәтті шыға бермейді. Ал бүлінген бетті қайта қалпына келтіру мүмкін емес. Сондықтан неғұрлым табиғи қоспалардан дайындалған өнімдерді тұтыну қауіпсіз әрі пайдалы.– Елімізде сапасы жоғары отандық косметика өнімдерін дайындауды ұзақ жылдар бойы армандап келдім. Тұтынушылардың көбі негізінен шетелдік қымбат косметика өнімдерін пайдаланады. Оның сапасына, құрамында не бар екеніне ешкім кепілдік бермейді. Кейде қымбат брендтердің өзі де күткеніміздей болмайды. Өйткені біз оның дардай атына ақша төлейміз. Ал арзанқол косметикалық өнімдердің құрамында тиімді әсер беретін құрамдас бөліктері толыққанды емес. Оның үстіне елімізге шет мемлекеттерден ағылып келіп жатқан импорттық косметика өнімдерінде есеп жоқ. Өкінішке қарай, оның көпшілігінің қай уақытта өндірілгені, елімізге қалай жеткізілгені, қалай сақталғаны белгісіз. Шетелдік бетті ағартатын кремдердің кейбіреуінің құрамында қорғасын болады. Ол бетті ағартқанмен зияны бар екенін жоққа шығармау керек. Сондықтан өнімдердің құрамында қандай қоспа бар екеніне көзіміз жететін, өзіміз сапасын бақылайтын бет күтіміне арналған отандық өнім шығаруға бел будым. Әрине, өнім шығарудың өз қиындығы мен машақаты бар. Дегенмен айналамдағы қолдаушыларымның арқасында бүгінде бастапқы нәтижеге қол жеткізе бастадық, – дейді AG cosmetics өнімдерінің иесі Гүлшаш Әубәкірқызы.
Тұсаукесерге арнайы келген Қазақстанның халық артисі Роза Рымбаева:
– Гүлшаштың Қытайдан атамекеніне келіп, өз орнын тауып, енді өндіріс ашып жатқаны үлкен еңбек. Бұл кез келгеннің қолынан келмейді. Мен осындай бауырларымыздың еңбегіне, жетістігіне қуанам. Біз тек қана ет пен ұн өндіріп қоймай, өзімізге қажет тауарлардың бәрін шығаруымыз керек. Әрқайсымыз өз өнімдеріміздің тұтынушысы болуға тиіспіз. Сонда еліміз дамиды. Мені шетелдің қымбат өнімдерін пайдаланады деп ойлайтын боларсыздар. Ол – қате пікір. Үстімдегі киім Қазақстанда тігілген. Жазғы демалысымды Алакөлде өткіземін. Енді міне, елімізде жасалып жатқан косметиканы қолдануға дайынмын. Отандық өндірушілерді өзіміз қолдамасақ, кім қолдайды? Германия машина шығарады, немістер міндетті түрде бірінші кезекте өз көлігін мінеді. Сол сияқты біз де өндірушілерімізді қолдап, елімізде өндірілген бұйымдарды тұтынайық, – деп тілектестігін білдірді.
Әзірге 12 түрлі косметикалық өнім шығарылып отыр. Алдағы уақытта оның қатары арта түседі. Бастапқы кезде тек елімізде таратыла бастағанмен, уақыты келгенде табиғи өнімді ТМД елдеріне де шығару мақсаты бар. Кәсіби тұрғыдан дайындалған өнім әртүрлі дәрумен мен минералға бай, бұл өз кезегінде өнімдерді терісінде ақауы бар адамдардың емдік дәрумен ретінде қолдана алады. Кесуге немесе екпеге жүгінбей-ақ осы өнімдер арқылы теріні қалпына келтіруге мүмкіндік бар. Тиімділігі аса жоғары өнімдер адам терісін тез қартаюдан сақтайды. Табиғи өнімді аллергияға бейімі бар адамдар қорықпай қолдана алады. Косметикалық өнімдер үшін жылына миллиардтаған теңгені шет мемлекеттердің қоржынына салып беріп отырғанымыз өкінішті. Енді көпшілік ақырындап өз өнімдерімізді тұтынуға бейімделе бастайды. Бұл өнімнің дайындалуына отандық ғалымдар да өз үлесін қосты.