Nur Otan партиясы республикалық деңгейде коронавирусқа қарсы күресті күшейту іс-шараларын жалғастыруда. Елдегі төтенше жағдайға байланысты Nur Otan партиясының Орал қалалық филиалы партиялық бақылау комиссиясы қала ішіндегі орталық «Мирлан» базары мен «Атриум» сауда орталығында орналасқан «Дина» супермаркетіндегі азық-түлік бағасының тұрақтылығын тексеру мақсатында арнайы рейд жүргізді. Оған Орал қалалық мәслихат депутаттары, «Ақжайық адалдық алаңы» жобасының мүшелері, «Антикор» орталығы және партияның белсенді мүшелері қатысты.
Іс-шара барысында сауда орталығындағы сатушыларға төтенше жағдай кезінде бағаны тұрақты етіп, жеміс-жидек пен көкөністі сақтау кезінде санитарлық нормаларды орындау керегі айтылды. Сондай-ақ тауар құнын негізсіз өсірген сатушыларға қатаң түрде ескерту жасалды. Рейд соңында аталған жұмыс тобы сатушыларға медициналық бетперде мен қол-ғап киіп жұмыс істеуге кеңес берді.
Айта кеткен жөн, Батыс Қазақстан облысы бойынша әлеуметтік маңызы бар азық-түлік тауарына шекті бөлшек бағалары тұрақты болғанымен, тексеріс кезінде басқа тауардың қымбаттауы байқалды. Сонымен қатар тауардың қымбаттау себебі делдалдар қызметінен туындап отырғаны белгілі болды. Жоғарыда аталған мәселе бойынша хаттама толтырылып, жұмыстану үшін жауапты органға жіберіледі. Мониторинг жүргізу шаралары алдағы күндері жоғарыда аталған жұмыс тобының мүшелерімен бірге жалғасын табады.
