Шымкентте «Сайлау – 2019: жоспарланған саяси науқанның ерекшеліктері» тақырыбында эксперттік талқылау жиыны өтті. Оған Шымкент қалалық қоғамдық кеңесінің төрағасы Нұрғазы Бұхарбаев, Шымкент қалалық «Азаматтық Альянс» заңды тұлғалар бірлестігінің президенті Жұмағали Білісбеков, Қазақстан Журналистер одағы Шымкент қалалық филиалының төрайымы Айгүл Қапбарова, журналист, блогер Сырым Итқұлов қатысты.
Мемлекет басшысын сайлауға қатысушылар арасында жан-жақты пікір алмасу өтті. Атап айтқанда, алдағы саяси науқанның ерекшелігін, өзгелерден айырмашылығын талқылады.
Талқылау барысында саясаттанушы Уәли Қыдыр әрбір қазақстандық елдегі жоспарланған саяси оқиғалардың мәнін түсіну керегін атап өтті.
– Еліміздегі елеулі саяси оқиға Қазақстан Президентін кезектен тыс сайлау науқаны қарсаңында Шымкент қаласы бойынша «Аманат» азаматтық платформасының эксперттік талқылауы ұйымдастырылды. Бұл науқан еліміздің демократиялық құндылықтарға сай ары қарай дамуының алғышарты бола отырып, қазіргі қалыптасқан әлеуметтік-экономикалық, қоғамдық-саяси әлеуетін ортақ арнаға тоғыстырады. Даму сабақтастығы жыл сайын қазақстандықтарға жаңа батыл міндеттер қоятын Елбасы Жолдауларын іске асыруға негізделген, – деді ол.
Кездесу барысында сарапшылар Қазақстандағы алдағы сайлауалды ұйымның негізгі аспектілерін талқылап, саяси процестің дамуына сараптамалық баға берді.
Басқосуда Қазақстан Журналистер одағы Шымкент қалалық филиалының төрайымы Айгүл Қапбарова сөз алып, алдағы сайлауда ел ертеңіне бей-жай қарамайтын әрбір адамның дауыс беріп, таңдау жасауы – азаматтық парыз екенін айтты.
– Шымкенттіктер барлық сайлауда белсенділік танытып келеді. Бұл жолы да халықтың белсенділігі жоғары деп айта аламын. Әлеуметтік желілерден байқағанымыздай, жастардың да қызығушылығы, қолдау білдіруі, азаматтық ұстанымы айрықша екенін аңғаруға болады. Биылғы сайлауға өңірдегі 122 мың жас қатысады деп күтілуде. Жалпы, 9 маусымда өтетін президент сайлауында Шымкент қаласында 260 сайлау учаскесі жұмыс істейді. Сайлау кезінде тұрғындарға қолайлы жағдай жасалмақ. Әрбір сайлаушының дауысы ел тағдырын шешеді. Сондықтан белсенді азаматтық ұстаным танытып, ортақ үйімізде бейбітшілік пен келісім үшін дауыс беруге тиіспіз, – деді Айгүл Қапбарова.
Талқылау соңында сарапшылар демократиялық сайлау және дауыс беру құқығы – демократияның қажетті элементтері, қазақстандық мемлекеттіліктің басты қағидасы екенін атап өтіп, елдегі жоспарланған саяси оқиғаның мәні және маңызына тоқталды.
Әбілмансұр ЖАСАН