Мәжіліс депутаттары Зағипа Балиева, Амангелді Дәуренбаев және Бақтияр Мәкен Алматыдағы Қазақ ұлттық аграрлық университетінің ұстаз-ғалымдарымен, жастарымен кездесті. Олар мемлекеттік ауқымды бағдарламалар барысын түсіндіріп, жастардың заман талабына сай білім алуы, ғылыммен айналысуы жөнінде кеңінен әңгіме қозғап, әлеуметтік мәселелер төңірегінде ой бөлісті.
Университет ректоры, ҰҒА академигі Тілектес Есполов қонақтарға оқу орнының бүгінгі жетістіктері мен алдағы мақсаттары туралы баяндап, мемлекет жүктеген міндеттерді іске асыруға байланысты әзірленген жұмыс жоспары аясында атқарылып жатқан нақты іс-шаралар барысы туралы мәлімет берді. Ректор Парламент депутаттары университеттің әр бастамасына, ғалымдардың ғылыми жобаларына үнемі қолдау көрсетіп, соның нәтижесінде тек биылдың өзінде университетте екі жоба бойынша көлемі 1,9 млрд теңгені құрайтын 2 жаңа инновациялық орталық және 2 зертхана ашылғанын, осы игілікті іс-шаралардың барлығы – жастарымыздың озық білім алуына, еліміздің кемел келешегін қалыптастыруына бағытталғанын атап өтті.
З.Бәлиева жастардың ғылыммен айналысуына, оларға әлеуметтік көмек көрсетуге, жалпы аграрлық ғылымды қолдауға халық қалаулылары барынша оң ықпал жасайтынына тоқталды.
Мәжілістегі Аграрлық комитеттің мүшесі Амангелді Дәуренбаев ауылды көркейтуге бағытталған мемлекеттік бағдарламалардың әлі де жетілдіруге қажетті тұстары бар екенін, университет ұжымы мен студенттердің талап-тілектерін ескере отырып, тиісті органдарға арнайы сауал жіберетінін айтты.
Қазақ ұлттық аграрлық университетінің түлегі, депутат Бақтияр Мәкенұлы өз сөзінде жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту мәселесі мемлекеттің ерекше назарында тұрғанын, жастардың жаңа білім алуына елімізде мүмкіндіктердің мол екенін нақты мысалдармен айтып өтті.
Жиын барысында университеттің оқытушы-профессорлары, білім алушы жастары депутаттарға өздерін толғандырып жүрген сұрақтарын қойды.
Қазіргі кезде оқу орнының жетістіктерімен қатар, әлі де толық шешімін таппай тұрған мәселелері де аз емес. Уақыт жылдам өзгеріп, білім, ғылым, өндіріске қойылатын талаптар күшеюде. Агроөнеркәсіптік кешенге жаңа инновациялық технологиялар енгізілуде. Сондықтан бәсекеге қабілетті, жаңаша ойлайтын, тиімді шешімдер қабылдай алатын, инновацияға бейім мамандар дайындаудың жаңа бағыттарын дамыту көзделуде. Отандық кадрларды даярлау, академиялық ұтқырлық аясын кеңейту, жаңа мамандықтар ашу, сұранысы жоғары мамандықтарға мемлекеттік тапсырысты көбейту, студенттердің әлеуметтік жағдайын жақсарту бойынша әлі де түйінді мәселелер бар.
Бүгінде универсиетте 90 пайыздан астам ауыл балалары білім алады. ҚазҰАУ студенттерінің басқа оқу орындарына қарағанда жатақханаға мұқтаждығы көп. Сондықтан университет басшылығы биыл 450 орынды жаңа «Студенттер үйін» салуды жоспарлап отыр. Қазіргі кезде оның құрылысының жобалық-сметалық құжаттары әзірленіп, тиісті органдарға ұсыныс ретінде жіберілді.