Nur Otan партиясының Алматы қалалық филиалының Jas Otan Жастар қанаты еріктілері мұқтаж жандарға бетперде таратуды бастап кетті. Елбасының бастамасымен құрылған Birgemiz қорынан көмек алатындар – I-III топтарға жататын мүмкіндігі шектеулі жандар, асырауында мүгедек балалары бар отбасылар мен медициналық-әлеуметтік мекемелер.
Бетперде тарату – партиялықтардың кезекті акциясы. Карантин енгізілгелі нұротандық волонтерлар қаланың жүздеген отбасына барып, халін білді, көмек қолын созды. Бұл шара аясында негізінен дүкенге азық-түлік үшін баруы қиын мүмкіндігі шектеулі жандар мен қарттар ескерілді.
– Елбасы Нұрсұлтан Назарбаев еріктілердің жасап жатқан жұмыстарына жоғары баға беріп және көмекке мұқтаж жандардың жағдайына бейжай қарамай, қол ұшын созғандарға алғысын білдірді. Партия еріктілері көмек қажет ететін отбасыларға жәрдемдесуді одан әрі де жалғастыра береді. Бұл жолы біз медициналық бетперде таратуды қолға алдық. Бетперде – коронавирус инфекциясынан қорғанудың басты құралы. Әлеуметтік әлсіз топқа жататын 40 мың отбасыға 50 бетпердеден таратылады. Бұл жұмыс кезең-кезеңімен күн сайын жүргізіледі, – дейді Nur Otan партиясының Алматы қалалық филиалының Jas Otan Жастар қанатының төрағасы Мәди Ахметов.
Атаулы көмек республикалық Birgemiz қорынан қаржыландырылып отыр. Almaty Birgemiz қоры көмекке зәру алматылық отбасыларға 50 мың теңгеден беруді бастап кетті. Осы күнге дейін 23 мыңнан астам азаматқа қаржылай көмек көрсетілді. Бұл жолы республикалық қордан 2 миллион бетперде тарату көзделіп отыр.
– Медициналық бетперде қаланың 8 ауданындағы мұқтаж жандарға таратылады, – дейді Мәди Ахметов. – Бұған дейін біз осы санатқа жататын отбасыларды азық-түлікпен қамтамасыз еткенбіз. Сосын қордан 50 мың теңгеден берілді. Біз бұл жолы да бастаған ісімізді сәтті аяқтаймыз деп сенеміз. Birgemiz бастамасының басты мақсаты – біздің бірлігіміз, әсіресе осындай қиын сәтте бір-біріміздің қасымыздан табылу.
