Ару Алматы мен оның маңында табыс табудың жолдары баршылық. Соған сай облыстың оңтүстік астана төңірегінде орналасқан аудандарында халық саны алға жылжыған жылдармен бірге артып қана қоймай, заңды-заңсыз құрылыс нысандары да қаптап кеткен. Әсіресе, күре жолдар бойында, өзен-сулардың жағалауларында бос орын қалмаған. Осынау аса күрделі мәселенің күрмеуін тарқату мақсатында Қарасай, Талғар, Іле, Жамбыл аудандары әкімдерін арнайы шақырып, облыстық деңгейдегі жауапты тұлғаларды қатыстыра отырып, кеңес өткізген Алматы облысының әкімі Амандық Баталов бірқатар кемшіліктер мен заңсыздықтарды көзге шұқып көрсетіп, оларды тез арада жөндеуді қатаң талап етті.
Өзінің бірінші орынбасары Лаззат Тұрлашовтың аталған аудандардағы заңсыз құрылыстарға қатысты есебін тыңдағаннан кейін алдағы кезде осы саладағы былық-шылыққа көз жұма қарағандар мен жол бергендерге аяушылық болмайтынын ескертті. Әсіресе, тура жанынан өтетін күре жол қайта құрылымдалып жатқан «Алтын Орда» базары маңындағы аумақтың тазалығына баса назар ауарған облыс басшысы Қарасай ауданының әкімі Жандарбек Далбағаевқа аталған аумақта жиналып қалған қоқысты дереу тазалауға, жоспарлы түрде бұзылатын нысандарды тез арада сүріп тастауға, аумақты тиісті талапқа сай етуге бір апта уақыт берді.
Жамбыл ауданының әкімі Бағдат Әлиевке Алматы – Бішкек халықаралық автотрассасы бойын тез арада ретке келтіру тапсырылды. Бұл жолдың екі жағында да заңсыз құрылыстар жетерлік. Сонымен бірге, тазалық талапқа сай емес. Ал Іле ауданындағы жағдай тіптен шектен шыққан. Басқасын айтпағанда, Үлкен Алматы айналма авткөлік жолының жанында ешқандай рұқсаты жоқ мұнаралы крандар жинастырып, металл құбырлар шығаратын кәсіпорынның заңсыз жұмыс істеп отырғаны анықталыпты. Өтеген батыр ауылы жанынан индустриалдық аймақ құру жөніндегі қазақ-араб бірлескен жобасының жүзеге асуында кешеуілдеу бар. БАӘ индустриалдық аймақта жұмыс істеуге тиісті жеті бірдей заманауи зауыттың құрылысына он миллиард теңгеге жуық инвестиция салуға дайын отыр. Алайда жер пайдалануға рұқсат алуда алдан шыққан кедергілер аяқтан шалуда. Талғар ауданы аумағында да жерді жөнсіз пайдалану, су қорғау аймақтары мен жолдар бойына ретсіз құрылыс салуға қатысты деректер толып жатыр.
Жалпы, облыс аумағында бір кездері су қорғау аймақтарынан, жолдар бойынан, ауылшаруашылығы мақсатындағы алқаптардан заңсыз беріліп кеткен жерлерді мемлекет мұқтаждығына қайтарып алу оңай болмай тұрған көрінеді. Соған сай жолдарды қайта төсеп, кеңейтуде, халыққа қызмет ететін әлеуметтік-мәдени нысандар салуда қиындық туындап отыр. Осыған байланысты облыс басшысы өзінің бірінші орынбасарына, сәулет және қала құрылысы басқармасы басшысына, мемлекеттік сәулет-құрылыс бақылау басқармасының жетекшісіне жүктелген міндеттерді орындау кезінде қажет болған жағдайда сотқа да жүгіну қажеттігін ескертті.
Болат АБАҒАН
Алматы облысы