Жамбылдық полиция қызметкерлері облыс орталығы іргесіндегі Жамбыл ауданында болған 15 бас мүйізді ірі қара мал ұрлығының ізін суытпай ашты.
14 мамыр күні Бесағаш ауылының тұрғыны Бескепе құм аймағында шаруа қожалығының жайылымынан 15 бас сиыры ұрланғанын айтып, арызданған болатын. Шаруа жалпы көлемі 2,2 миллион теңгедей шығын көрген еді. Полицейлер жедел-іздестіру нәтижесінде ұрланған малды тасыған жүк автокөлігін тапты. Қылмыс ізі оқиғаға Байзақ ауданы Құмжота ауылы тұрғынының қатысын көрсетті. Ол өзінің танысының, осы аудандағы Сарыкемер ауылының тұрғынының өтініші бойынша жайылымға барғанын және онымен бірге малды Жуалы ауданының Қайрат ауылына жеткізгенін мәлімдеді. Сондай-ақ қылмысты ұйымдастырушы Тараз қаласының тұрғыны оған машина табу керегін айтқан. Сонымен қатар ол ұрлыққа қатысушылардың барлығын өз мақсатына пайдаланған, яғни ұрланған малды өзінің малы ретінде көрсетіп, Жуалы ауданы Қайрат ауылындағы туысын малға уақытша қарап, таудағы өз малына қосып бағуды өтініп сұраған екен. Қазіргі уақытта ірі мал ұрлығын жасаған күдікті өз кінәсін мойындап, Жамбыл АПБ уақытша ұстау абақтысына қамалды. Мал басы иесіне қайтарылып, осы дерекке қатысты ҚР ҚК-нің 188-бабының 3-бөлімі бойынша сотқа дейінгі тергеу амалдары жүргізіліп жатыр дейді құзырлы сала мамандары.
Жамбыл облысы