Алматы облысындағы 768 мектептің 14 мыңнан астам түлегі мектеппен қоштасып, үлкен өмірге қадам басты. Жер-жерде соңғы қоңырау мерекесі өткізілді. Облыс басшысы Амандық Баталов Талдықорғандағы Назарбаев Зияткерлік мектебіне барып, ұстаздар мен оқушыларды оқу жылының аяяқталуымен құттықтап, түлектерге сәт-сапар тіледі.
Мемлекет қамқорлығының арқасында білім саласының дамып, бәсекеге қабілетті бола түскеніне тоқталып, өңірде заманауи мектептер салынып, білім нысандарының материалдық-техникалық базалары нығайтылып, педагогикалық ұжымдарға тиісті қолдау шаралары көрсетіліп отырғанын айта кетті. Жетісу жеріндегі білім саласы бағындырған биіктерде Назарбаев Зияткерлік мектебінің үлесі зор екенін де еске салды.
– Құрметті жас түлектер, оқушылар, ұстаздар мен ата-аналар! Бұл мектепке үнемі үлкен толқыныспен келемін. Себебі, Талдықорған қаласындағы Назарбаев Зияткерлік мектебі елімізде жүзеге асырылып жатқан жарқын жобалардың бірі және алға жылжыған жылдармен бірге өзіне артылған үмітті толығымен ақтап келеді. Мұнда сендерге сапалы білім алуға барлық жағдай жасалған. Талдықорғандағы Назарбаев Зияткерлік мектебінің қатарынан бес мәрте үздік олимпиадалық мектеп атануы – сіздердің және мектеп педагогтары еңбегінің жемісі. Соңғы қоңырау – балалықпен қоштасу мен жаңа өмірге аяқ басудың белгісі. Әрқашан өздеріңе білім берген мектептеріңмен, өскен қалаларыңмен, бар күш-жігерін жұмсап, сендерді оқытып, тәрбиелеген ұстаздарыңмен, сендерді аялап өсірген ата-аналарыңмен және әрбір адамның дамуына мүмкіндік жасап отырған тәуелсіз Қазақстанмен мақтана біліңдер. Армандарың айқын, талаптарың биік, жолдарың ашық, сапарларың сәтті болсын! – деген Амандық Ғаббасұлы ата-аналарды, ұстаздарды, оқушыларды оқу жылының аяқталуымен құттықтады.
Мектеп директоры өзі басқаратын ұжым мен мектеп оқушыларының алғысын жеткізді. Облыс әкімдігінің мектепке 3D принтер сыйға тартқанын айрықша атап өтті.
Соңғы қоңырау салтанаты барысында 2018-2019 оқу жылының қорытындысы шығарылып, озат оқушылар марапатталды. Атап айтқанда, оқуда үздік, түрлі пән олимпиадаларында, ғылыми конкурстарда, мектептің қоғамдық өмірінде жетістіктері бар 8 оқушы «Жылдың үздік оқушысы» аталымының жеңімпазы атанды. Олардың арасында оқу жылы бойы «Уикипидия» онлайн-энциклопедиясының контентін толықтыруға үлес қосқан 11 «А» сынып оқушысы Алмас Нұрғалиев, 11 «Д» сыныбының оқушысы, жалпы білім беру пәндері бойынша математикадан республикалық олимпиаданың күміс жүлдегері, Украинада математикадан өткен Еуропалық олимпиаданың қола жүлдегері Аружан Сабырбек, 12 «С» сынып оқушысы, биология бойынша ғылыми жобалар республикалық конкурсының 1-орын иегері, жалпы білім беру пәндері бойынша ғылыми жобалар конкурсының 1-орын иегері Оксана Дмитриенко және тағы басқалар бар.
Дәстүр бойынша «Жылдың үздік шаңырағы» топтық аталымының жүлдегерлеріне кубок тапсырылды. Халықаралық аккредитация өткізу процесіне қосқан үлесі үшін мектептің қамқоршылық кеңесінің төрағасы Арыстанбек Стыбаевқа алғысхат берілді.
Мұнан соң мектеп оқушылары дайындаған концерттік бағдарлама ұсынылып, оқу жылының аяқталғанын айғақтайтын қоңыраудың соңғы сыңғыры қағылды. Салтанат қонақтары мен мектеп ұжымы, оқушылар қызу қол соғып, түлектерді соңғы сабаққа шығарып салды.
Амандық Баталов жұртпен бірге мектеп ішін аралап, оқушылармен, ата-аналармен әңгімелесті. Оқушылар робототехника, ауыл шаруашылығы, салаларындағы өздерінің ғылыми-зерттеу жобаларын, ғарышты игеру сынды зерттеулерімен таныстырды. Облыс әкімі мектеп бітірушілердің сынып сағатына қатысып, онда өзінің мектеп бітіргеннен кейінгі мамандық таңдауы жайындағы естеліктерімен бөлісті.
Алматы облысы
Болат АБАҒАН