Президенттіктен үміткер коммунист Жамбыл Ахметбековтің сенімді өкілі Тараз қаласындағы «Дана-дель» ЖШС еңбек ұжымымен кездесті. Кәсіпорын – тігін өнеркәсібі саласындағы ірі ательелердің бірі. Мұнда осы кәсіпті үйренем деушілерге арналған оқу орталығы да бар.
Халық коммунисінің өкілі Жарылқасын Нұралиев еңбек адамының мүддесі, кедейшілікпен күрес, сонымен қатар жалған құндылықтардан бас тарту – Ж.Ахметбековтің сайлауалды тұғырнамасының басым бағыты екенін айтты. Қатысушылар үміткердің сенім білдірілген өкіліне өздерін толғандырған сұрақтарын қойды. Тұрғындар қаланың экологиялық жағдайына алаңдайтынын жеткізді.
Жамбыл Ахметбековтің сенімді өкілдерінің бірі талдықорғандық сайлаушылармен кездесті. Кандидаттың Алматы облыстық сайлауалды штабының жетекшісі Сәуле Биғарова Талдықорған қаласының Д.Қонаев атындағы этнографиялық музейін аралап, Оқушылар сарайында сайлаушылармен кездесті. Сәуле Биғарова ақшаға табынушылық, кез келген жолмен табыс табу және адамгершілікке жат дәстүрлер Отанымыз үшін қауіпті екенін айтты. Сонымен қатар ол ҚКХП үміткерінің сайлауалды тұғырнамасын таныстырды.
Облыстық сайлауалды штаб жетекшісі Қазақстанның әрбір азаматы ел болашағына жауапты екенін алға тартып, сайлаудың маңызы жайлы әңгімеледі. Ол қазақстандықтарды 9 маусым күні сайлауда дауыс беруге шақырды.
Айдана БЕГІМ