Екі адам қаза тауып, бес адам Маңғыстау облыстық ауруханасына жатқызылды. Бұл туралы Маңғыстау облысы Денсаулық сақтау басқармасының баспасөз қызметі хабарлады.
Жол оқиғасы 22 мамыр күні Ақтау-Қаламқас тас жолында болған.
Оқиға орнына жеткен жедел жәрдем бригадасы 1984 жылы туған жас жігіттің және 1975 жылы туған әйелдің биологиялық өлімін тіркеді. Алынған жарақаттар өте ауыр болды.
- Тағы үш ер адам мен екі әйел Маңғыстау облыстық ауруханасының қабылдау бөлмесіне жеткізілді. 1965 жылы туған әйел мен 1986 жылы туған жас жігітке жабық бас сүйек-ми жарақаттары мен миы шайқалған деген диагноз қойылды. Олар нейрохирургиялық бөлімшеге жатқызылды. 1960 жылы туылған тағы бір әйелге жабық бас сүйек-ми жарақатын және ми шайқалуы диагнозы қойылған. Ол травматологиялық бөлімшеге жатқызылды. Реанимация бөлімінде төртінші зардап шеккен адам – омыртқаның кеуде бөлігінің жабық асқынған сынығы бар 19 жасар жігіт. Оған операция жасалды. Жағының жоғарғы бөлігі сынған 1999 жылғы бесінші науқас хирургиялық бөлімшеге жатқызылды, - деп хабарлады ведомствоның баспасөз қызметі.
