Алматы облысының кәсіпкерлер палатасында Талдықорған қаласы бойынша қатты тұрмыстық қалдықтарды тасымалдаумен айналысатын кәсіпкерлерді алаңдатқан мәселеге қатысты жиын өтті. Нәпақасын қаладан шығатын қатты тұрмыстық қалдықтарды шығару арқылы тауып жүрген жергілікті кәсіпкерлер облыс орталығынан тасымалданатын қалдықтарды орналастыру полигонын сенімді басқаруға алған ADAL DAMU Capital ЖШС-ның қалдықтарды қабылдау қызметіне тарифті ешкіммен келіспестен өз бетімен белгілейтіндігіне орай шағымданды.
Біз бұл туралы бұған дейін де бірнеше мәрте мәселе көтердік. БАҚ өкілдерін де қостық. Алайда мәселенің шешім табатын түрі жоқ. Қалдықтарды шығару мен жоюға бірыңғай тариф керек. Сонда ғана барлығымыз бірдей әрі тең жағдайда жұмыс істей аламыз. Сондықтан кәсіпкерлер палатасына жүгіндік», – дейді тасымалдаушы компаниялардың өкілдері.
Өңірлік кәсіпкерлер палатасындағы кәсіпкерлердің құқығын қорғау және әкімшілік кедергілерді азайту жөніндегі бөлімнің басшысы Әділет Сұлтанбектің айтуынша, Экологиялық кодекске сәйкес, жергілікті өкілетті орган коммуналдық қалдықтарды жинау, шығару, көму мен жою жөніндегі тарифтерді бекітуге тиісті. Талдықорған полигонындағы тариф құны бойынша қалалық әкімдік тарифтік жоба ұсынған соң, мәслихат оны мақұлдауы керек.
Ал ADAL DAMU Capital ЖШС директоры Ерлан Дүйсебаевтың пікірінше, әкімдік 2017 жылдан бері қалдықтарды қабылдау қызметіне тарифтерді бекітуді сөзбұйдаға салып, уақытын жөнсіз созып келеді. Компания қоқысты қабылдап, орналастырып қана қоймай, сонымен бірге қалдықтары өңдейтін зауыт ретінде жұмыс істейтіндіктен, осы жылдың сәуір айында аталмыш мәселені бұқаралық ақпарат құралдарында көтеріпті. Одан бері де бірнеше ай өтті. Бекітілмеген тарифтің салдарынан зауыт шығындар көлемін есепке ала отырып, тарифті өз бетінше енгізуге мәжбүр. Өйткені кәсіпорын бүгінге дейін жоспарланған өндірістік қуаттылығына шыға алмаған. Қазіргі таңда ADAL DAMU Capital ЖШС тасымалдаушылардың ұсыныстарын ескеріп, екі жаққа да тиімді әріптестік үшін қажетті жағдайлар жасауға дайын көрінеді.
Талдықорған қаласының тұрғын үй коммуналдық шаруашылығы бөлімінің өкілі Мейір Нұрғалиев тарифтік жоба әзірленіп, тіркеу үшін әділет басқармасына жіберілгенін, әкімдіктің жоспарынша, жаңа тариф шілде айының басында енгізілетінін жеткізді.
Бірақ бұған дейінгі құрғақ уәдеден әбден жалыққан кәсіпкерлер шенділердің сөздеріне сенуден қалған. Себебі, сәуір айының басында тұрғын үй коммуналдық шаруашылығы бөлімінің бас маманы Мадияр Нұрахметов «Хабар 24» телеарнасының берген сұхбатында тарифтің 2019 жылдың мамыр айында бекітілетінін хабарлаған болатын. Қазір мамырды айтпағанда, маусым айы аяқталуға жақын.
Кәсіпкерлер мен әкімдік өкілдерінің қатысуымен болған жиынның қорытындысы бойынша кәсіпкерлер палатасы қалалық мәслихатқа тарифті бекіту мәселесін тездетуді тапсырды. Сонымен бірге, кәсіпкерлер шағымы тиісті шараларды қолдану үшін қалалық прокуратураға жіберілді.
Болат АБАҒАН,
Алматы облысы