Елімізде болып жатқан ауқымды саяси өзгерістерге Қазақстан халқы ассамблеясы да үн қосты. Соған орай, Ұлттық академиялық кітапхана төрінде ҚХА ғылыми-сарапшылық кеңесінің кеңейтілген отырысы өткізілді.
«Бүгін Ұлы тарихымыздың тағы бір шебіне тәуелсіздігі бекем, болашағы айқын ел ретінде қадам бастық. Осының бәрі қоғамдық бірлік пен ішкі саяси тұрақтылықты сақтауымыздың, ұлтаралық қатынастарды реттеудің тиімді тетіктерін жасай алуымыздың арқасында мүмкін болып отыр. Бұл Қасым-Жомарт Тоқаевтың сайлауалды бағдарламасында айқындалған «Сабақтастық. Әділдік. Өрлеу» принциптерімен ұштасады. Сабақтастық деген қоғамның бірлігін сақтау, ел азаматтарының тұрмыс сапасын арттыру. Осы орайда қоғамдағы әлеуметтік-экономикалық және саяси-рухани өзгерістер мен жаңаруларды жүргізуге ассамблея белсене атсалысып жатыр», – деді кеңесті ашқан ассамблея Төрағасының орынбасары – Президент Әкімшілігі ҚХА хатшылығының меңгерушісі Ж.Түймебаев.
ҚР Президенті жанындағы МБА этносаралық және конфессияаралық қатынастарды зерттеу орталығының жетекшісі, ҚХА ҒСК төрайымы, әлеуметтану ғылымдарының докторы А.Сәдуақасова «Қазіргі кезеңдегі Қазақстан халқының бірегейлігі мен бірлігі: даму үрдістері» атты, «Экономикалық зерттеулер институты» АҚ басқарма төрағасының орынбасары, экономика ғылымдарының докторы Ш.Жақыпова «Қазақстандық қоғамның этноәлеуметтік құрылымы туралы» баяндама жасады.
«Жұмыла көтерген жүк жеңіл». Біріксек, талқыласақ, жүзеге асырсақ, шешілмейтін жағдай, жақсармайтын тұрмыс жоқ. Әлеуметтік жағдайды жақсартуға байланысты ҚХА Төрағасының орынбасары, Нұр-Сұлтан қаласы өзбек этномәдени бірлестігі төрағасы Шерзод Пулатов: «Жаңадан сайланған президентіміз алға бірнеше бағыт қойды. Бүгінгі ғылыми-сарапшылық кеңес осы бастамаларды жүзеге асыру үшін қандай жұмыстар атқару керегін талқылады. Соның ішінде көпбалалы аналардың жағдайына байланысты жаңаша көзқараспен, жаңаша жол ұсынбақпыз. Құр уәде бермей, нақты іске көшуіміз керек. Әлеуметтік желілерде тарап жүрген әңгімелерге сенбей, татулығымызды жоғалтып алмауымыз абзал. Біздің басты байлығымыз – бірлік. Қазақстан – біздің ортақ Отанымыз. Осындай кезде әр азамат өзінің отансүйгіштігін дәлелдеуі керек», – деді.
Ассамблея жастарды қолдауды ешқашан ұмытқан емес. ЕҰУ Қазақстан халқы ассамблеясы кафедрасының доценті Хамил Масловтың айтуынша, Жастар жылы аясында біршама шара ұйымдастырылған: «ЕҰУ-де осыдан 6 жыл бұрын ашылған ҚХА кафедрасы жастарды оқу-ағарту саласына тартып келеді. Студенттер арасында түрлі ғылыми, тәрбиелік бағыттағы шаралар ұйымдастырылып жүр. Соның бірі – биылдан бастап 1-курс студенттеріне рухани жаңғыруға, мәңгілік ел құндылықтарына байланысты арнайы оқу курсы енгізілді. Бұл Қазақстанның түкпір-түкпіріндегі жоғары оқу орындарында оқытылып жатыр. Студенттер ғылыми жұмыстарын осы арнайы курстар аясында алып жатыр».
Тату елге тыныштық орнайды, бейбіт елде ғана береке болады. ҚХА Төрағасының орынбасары Ж.Түймебаев: «Ғылыми-сарапшылық кеңестің мақсаты – саяси жағдайларға болжам жасап, қоғамды алауыздықтан сақтау. Яғни, халық санасына саңылау сала отырып, демократия құндылықтарының дәнін егу, жастарды отансүйгіштікке тәрбиелеп, этносаралық қатынасты нығайту, – деп ғылыми-сарапшылық кеңес жұмысының өзекті мәселелерін талқылап, іске асырылуы тиіс бірқатар тапсырмалар берді.
Көктем ҚАРҚЫН