«Рухани жаңғыру» бағдарламасының мемлекеттік қызметкерлерге арналған «Өзгерістерді өзіңнен баста» кіші бағдарламасына Мемлекеттік қызмет істері және сыбайлас жемқорлыққа қарсы іс-қимыл агенттігі жетекшілік етуде.
Ол – рухани тазару процесі. Ұлттық сана серпілісі.
Өзгерісті өзіңнен бастау дегеніміз – өзгелердің қатесінен сабақ алып қана қоймай, жетістіктерінен де үлгі алу. Мемлекеттік органдардың ұйымдастырушылық мәдениетіндегі өзгерістер мәселелері жан-жақты талқыланды. Оның ішінде мемлекеттік қызметшілердің санасын транформациялауға және тиімді жұмыс атқаруына кедергі келтіретін күнделікті жұмыстағы «қосымша» элементтерден арылту қажеттігі бар.
Статистикаға сенсек, мемлекеттік қызметкерлердің басым бөлігі күн сайын міндеттерін адал атқарып, мемлекет пен оның азаматтарының мүддесі үшін жұмыс істейді. Осыған қарамастан мемлекеттік қызметкерге қатысты БАҚ-та және әлеуметтік желіде жазылатын түрлі кереғар дерек көбейіп тұр. Осындай жағдайда мемлекеттік қызметке тұруға талпыныс білдіріп, конкурстан өте алмай қалған мамандар ешқашан да өздерін жазғырмайды. Байқаудағы сәтсіздігі үшін өзін емес өзгені жазғыруға пейіл тұрады. Қызметке тұру үшін жоғарыда танысыңның болуы керегін айтып, налиды. Бірақ одан еш пайда жоқ. Бұл жерде нақты іс пен әрекет керек. Яғни, өзгерісті өзіңнен бастауың қажет. Бүгінде білікті де білімді, тәжірибелі жас мамандар республикалық конкурстарға қатыстып, мемлекеттік қызметке жиі орналасады. Бұл қалыпты жағдайға айналды.
«Рухани жаңғыру» бағдарламасының аясында қолға алынған басты мәселе – қызметкерлердің санасын өзгерту. Мемлекеттік қызметкерлерге қатысты көп мәселе олардың кейде халық алдында көрсететін бюрократиялық қылықтарына қатысты көтерілсе, кейде кәсіби міндеттері мен әрекеттеріне адамдардың шағынуынан туындайды.
Елбасымыздың рухани жаңғыруға, руханиятқа, білім мен ғылымға маңыз беруі – үлкен көрегендік пен ұлттың алға ілгерілеуін жылдам қарқынмен жылжытатын қозғаушы күш. Рухани байлықтың кемел болғаны бұл жеке азаматтарымыз үшін де, әрбір жеке тұлғадан құралған қоғам, туған еліміз үшін де өте маңызды. Бұл ретте, тұтас қоғамның және әрбір қазақстандықтың санасын жаңғыртудың нақты алты бағытына жеке-жеке тоқталады. Олардың қатарына бәсекеге қабілеттілік, прагматизм, ұлттық бірегейлікті сақтау, Қазақстанның революциялық емес, эволюциялық дамуы, сананың ашықтығы жатады. Бұл бағыттың барлығы да өзекті. Адам түзелмей заман да түзелмесі белгілі.
Әрбір мемлекеттік органда сананы өзгерту бойынша тұжырымдама жобасы енгізіліп, оның басымдықтарына сәйкес «Өзгерістерді өзіңнен баста» кіші бағдарламасы жүзеге асырыла бастайды. Сонымен қатар Агенттікте мемлекеттік қызметшілердің санасын жаңғырту, талқылау және шешімдерді қабылдау тетіктерін трансформациялау арқылы жұмыстар жүйелі түрде жүргізілуде.
Жылдың басынан бері Агенттіктің алқа отырыстарының жұртшылықпен сұхбаттасу тұжырымдамасына негізделген жаңа форматы сынамадан өткізілді. Жергілікті атқарушы органдардың мемлекеттік қызметкерлері, қоғамдық бірлестіктердің өкілдері, сарапшылар тікелей эфирде мемлекеттік қызметтерді көрсету сапасын бақылау, сыбайлас жемқорлыққа қарсы саясат, мемлекеттік қызмет саласындағы мәселелерді кеңінен талқылады. Ұжымның пікірін есепке алу, әрбір адам өз бастамаларын көрсетуі үшін жағдайлар жасау мақсатында оның мүшелерімен қарама-қарсы байланыс тетіктері енгізілуде, яғни ақпараттық жүйелер арқылы сауалнамалар жүргізілуде.
Стратегиялық сессиялардың форматы жұмысымыздағы формализм мен бюрократизмді барынша жояды, стратегиялық ойлауды, креативтілік пен бастамашылықты дамытып, барынша ашықтықты қамтамасыз етеді.
Аппаратының жұмысын ұйымдастыру бойынша мәжілістер ішкі даму сессияларымен трансформацияланған, онда стратегиялық құжаттарды іске асырудың жедел мәселелері талқыланады.
Агенттік басшылығының әрбір бастамашыл қызметкермен және басқа мемлекеттік органдардың өкілдерімен тікелей байланысының тағы бір тетігі былтырдан бері енгізілген «Идеялар фабрикасы» болып табылады. Бұл алаңда әркім өзінің бастамасын Агенттік басшылығына тікелей көрсете алады. Бұндай тетік басқарушы тұлғалардың, уәкілетті адамдардың арасында дағдыға айналған бюрократтық және иерархиялық кедергілерді болдырмайды. Қатардағы бастамашыл қызметкерлер де стратегиялық шешімдерді қабылдай алады.
Бұдан басқа, 2019 жылдың ақпанынан бастап Агенттікте Casual free fryday тәжірибесі енгізілді. Ол бойынша апта сайын мемлекеттік қызметкерлер әскери киім үлгісін еркін киім үлгісіне ауыстырады. Киім киюдің еркін үлгісі мемлекеттік қызметкерлерге жұмыста өздерін еркін сезінуге және шығармашылықпен айналысуына ықпал етеді деп болжанады. Бірақ әлемде оның тиімділігі ежелден дәлелденген.
Осындай жаңашылдықтар нәтижесін бере бастады. Бұған мысал ретінде Агенттіктің жаңа жұмыс кестесін алуға болады. Қызметкерлер рухани дамуға ғана емес, физикалық дамуға да көп көңіл бөле бастады.
Әрбір мемлекеттік қызметкер өзінің алдында үлкен мүмкіндік тұрғанын түсінуі тиіс. Еңбекқорлығымен, табандылығымен, адалдығымен, отансүйгіштігімен, жоғары моральдық және адами қасиеттерімен біздің еліміздің дамуына үлесін қосуы керек. Қол жеткізген жетістіктерге қанағаттанып, тоқтап қалуға болмайды. Өйткені жылдам қарқынмен дамыған қазіргі заманғы технологиялар ғасырында бес минуттық кідіріс те кез келгенді артта қалдыра алады. Өзгерістерді өзіңнен баста!
Саян АХМЕТЖАНОВ,
Мемлекеттік қызмет істері және сыбайлас жемқорлыққа қарсы
іс-қимыл агенттігінің аппарат басшысы