Солтүстік Қазақстан облысында әлеуметтік нысандардың құрылысы мен жөндеу жұмыстарына Nur Otan партиясының депутаттарынан құрылған арнайы мониторингтік топ бақылау жүргізуде. Qutty meken партиялық жобасы аясында іссапарға шыққан топ «Абылай хан резиденциясы» мемориалдық кешенінде жүргізіліп жатқан жөндеу жұмыстарымен танысты.
Рейд барысында ғимаратта су бұру жүйесінің жоғы белгілі болды. Топ мүшелері әр жаңбырдан кейін су жаңа тас төсеуіштің астына ағатынын, соның салдарынан «ығысу» пайда болуы мүмкін екенін де тілге тиек етті. Сондай-ақ кездесу кезінде жаңа тас төсеуішті сапалы етіп салу мәселесі бойынша да бірқатар ұсыныс айтылды.
– Су бұру жүйесін дұрыс орналастырудың маңызы өте жоғары. Сондықтан оған атүсті қарауға болмайды. Бұған дейін ескі төсеуіште жаңбырдан кейін су толып қалып жүрді. Енді бұл мәселені де ретке келтіретін кез келді, – дейді мониторингтік топтың мүшесі Алан Жуков.
Айта кетейік, бұл кездесуге мердігер компания мен нысанды қадағалауды жүзеге асыратын ұйымның басшысы келген жоқ. Сондықтан мониторингтік топ мүшелерінің сұрақтарына нысанның жөндеуін жүргізетін МИРАС GROUP ЖШС құрылысшы-шебері жауап берді. Ол бастапқыда жобада су бұру жүйесін орнату жоспарланбағанын айтты. Бірақ мониторингтік топ мүшелерінің араласуынан кейін, бұл мәселені қайта қарауға тура келгенін жеткізді. Әңгіме барысында нұротандықтар аталған нысанды бірнеше апта өткен соң тағы да тексеретінін, жөндеу сапасын қадағалауда ұстайтынын айтты.
– Резиденциядағы жағдаймен мониторинг барысында толықтай таныстық. Ретке келтіретін жұмыстар әлі де көп. Соның бәрін уақытылы жөндеуден өткізсе, бұл мәселе де өз шешімін таба жатар. Біраз уақыттан кейін біз осы нысанға қайтадан келеміз. Жұмыстардың қалай жасалғанын, ескертпелердің талапқа сай орындалуын тексеріміз. Сол кезде ғана атқарылған жұмыстың сапасын көріп, мердігер компанияның жұмысына бағамызды береміз, – деді СҚО мәдениет, мұрағаттар және құжаттама басқармасы басшысының орынбасары Досбол Әбдірісов.
Резиденцияны жөндеу 2020 жылдың мамыр айында басталған болатын. Жөндеу жұмыстарына 33 миллион 740 мың теңге бөлінді. Ал нысанды пайдалануға беру тамыз айына жоспарланып отыр.
