Qutty meken партиялық жобасы аясында мониторингтік топ Солтүстік Қазақстан облысындағы бірқатар медициналық мекемелерді аралап, ондағы жүргізіліп жатқан жөндеу жұмыстарында бірқатар кемшіліктердің барын анықтады.
Nur Otan партиясы СҚО филиалы баспасөз қызметінің мәліметінше, арнайы бақылау тобы облыстық фтизиопульмонология орталығына, облыстық ЖИТС алдын алу және оған қарсы күрес орталығына және көпсалалы қалалық ауруханаға барған.
Облыстық ЖИТС орталығындағы зертханаға күрделі жөндеу жүріп жатыр. Құрылысшылар 5 тамызда аталған нысанды қолданысқа беруі керек екен. Әзірге бәрі кестеге сай жүзеге асырылуда. Ал Петропавлдағы көпбейінді қалалық ауруханада 1-қабат пен жертөле күрделі жөндеуден өткізіледі. Қазіргі уақытта конкурстық рәсімдерді ұйымдастыру жоспарланған. Тексерушілер жұмыстың жылыту маусымы басталғанға дейін аяқталуы қажет екенін айтып отыр.
Мониторинг барысында фтизиопульмонология орталығында мониторинг тобының мүшелері кір жуатын жерді күрделі жөндеп жатқан мердігерде жұмыс кестесінің болмағанын анықтады. Сонымен қатар нысанда жұмыспен қамту орталығы арқылы жұмысқа орналастырылған бірде-бір адам жоқ болып шықты.
– Кір жуатын орынды компания 2,5 айдың ішінде жөндеп тапсыруы тиіс. Алайда жұмыс жүргізу кестесі жасалмаған. Жұмыспен қамту орталығы арқылы олар 8 адамды жұмысқа орналастыруы керек еді, іс жүзінде бірде-бір адам жоқ. Адамдар жеке қорғаныс құралдарынсыз жұмыс істеуде. Міндеттеме бойынша материалдың 90%-ы қазақстандық болуы тиіс. Бірақ кір жуатын орынға қажетті барлық жабдықтар Ресейден әкелінген. Олар өз міндеттемелерін толық орындамай отыр, – деді мониторингтік топтың жетекшісі Юрий Белоног.
Дәл осындай жағдай фтизиопульмонология орталығының күрделі жөндеуден өтіп жатқан 3-қабатында да анықталды. Мұндағы жұмыстар 3 айдың ішінде аяқталуы керек еді, өкінішке қарай жұмыс кестесі құрылмаған. Құжат бойынша жұмыспен қамту орталығынан 15 адам жұмысқа орналастырылуы қажет болса, нысанда іс жүзінде тек 1 адам ғана еңбек етіп жүр.
Тексеріс кезінде барлық медициналық орталықтың басшыларына ескерту жасалды. Алдағы уақытта аталған мониторингтік топ бұл нысандарды басты назарда ұстайтынын айтты.
