Арыс тұрғындарына Қазақстанның түпкір-түпкірінен көмек беруге ықылас танытып жатқан азаматтардың саны артып келеді. Кеше халықпен есептік кездесуінде Қазақстан Ақпарат және қоғамдық даму министрі Дәурен Абаев осылай хабарлады.
«Арыстағы ағайынмен біз де бірге екенімізді айтқым келеді. Кешегі қайғылы оқиғада қаза болған азаматтардың туған-туыстары мен жақындарына қайғырып көңіл айтамыз. Жарақат алған кісілердің тез сауығып кетуін тілейміз. Біз тағы да елдігімізді таныттық, «Жұмыла көтерген жүк жеңіл» демекші, осындай тосын оқиғада бір жұдырықтай жұмыла білетін бірлігімізді көрсеттік. Арыстан уақытша эвакуацияланған ағайынға Қазақстанның түкпір-түкпірінен көмек беруге ықылас танытып жатқан азаматтардың да саны артып жатыр», – деді Дәурен Абаев.
Осы орайда, министр Мемлекет басшысы Қасым-Жомарт Тоқаев оқиға орнына арнайы барып, халыққа тиісті қолдау мен көмек көрсетілетінін айтқанын еске салды. «Кешеден бері «Арыс, біз біргеміз» атты акция ұйымдастырылып жатыр. Біз де арыстықтармен біргеміз. Ақпарат және қоғамдық даму министрлігінің қызметкерлері де зардап шеккен қалаға көмек ретінде біркүндік жалақымызды аударамыз. Біздің министрлікке қарасты ұйымдар да осындай қадам жасап жатыр екен. Бұл бастаманы қолдаймыз», – деді министр.