Жиынға Түркістан облыстық Қазақстан халқы Ассамблеясы хатшылығының меңгерушісі, Мақтаарал ауданындағы облыстық штабтың әлеуметтік мәселелер жөніндегі жетекшісі Ғани Рысбеков, «Nur Otan» партиясының Түркістан облыстық филиалы төрағасының бірінші орынбасары Бейсен Тәжібаев, аудандық партия өкілдері, су тасқынынан зардап шеккен ауыл округтерінің әкімдері, құқық қорғау органдары мен аудандық әкімдіктің идеология бөлімінің басшылары мен мамандары қатысты.
Жиында сөз алған облыстық штабтың әлеуметтік мәселелер жөніндегі жетекшісі Ғани Рысбеков су тасқынынан зардап шеккен тұрғындардың өтемақыларын тездетіп төлеу, олардың жағдайын жақсарту, тұрғын үй салу кезіндегі қиындықтарын еңсеру, Өргебас, Фирдоуси ауылдарындағы қалыпқа келтіру жұмыстарына қолдау білдіру жөніндегі жұмыстарды ширату керек екеніне тоқталды.
«Nur Otan» партиясының Түркістан облыстық филиалы төрағасының бірінші орынбасары су тасқынынан зардап шеккен тұрғындардың өтемақыларын төлеу жұмыстарына білікті мамандарды тарту керегін, халықпен тығыз байланыс орнату, түсіндіру шараларын ұйымдастыру қажеттілігін атап өтті.
Бұдан соң арнайы топ Мырзакент маңында бой көтеріп жатқан жаңа шағынаудандағы құрылыс жұмыстарымен танысты. Айта кетейік, бүгінде мұнда 383 үйдің құрылысы жүргізіліп жатыр. Оның 193-і үкіметтік резервтің қаржысына, 190-ы қорлардың есебінен бой көтеруде. Соның ішіндегі 20 үй «Nur Otan» партиясының үйлестіруімен Birgemiz қорының қолдауымен салынуда. «Nur Otan» партиясының Түркістан облыстық филиалы төрағасының бірінші орынбасары Бейсен Тәжібаев құрылысшылармен тілдесіп, құрылыс басындағы жағдайды біліп қайтты.
Қазіргі таңда жаңа шағынауданда 188 үйдің іргетасы құйылып, 73-інде қабырға көтеру жұмыстары басталды. Сондай-ақ екі үйдің шатыры жабылуда. Құрылыс жұмыстары екі кезең бойынша жүргізіліп жатыр. Үй салуға қажетті техникалар мен құрылыс материалдарынан тапшылық жоқ.
