Университет Nur Otan партиясының Атырау облыстық филиалымен бірлесіп «Цифрлы Қазақстан» аясында ІТ орталық құрылған. Атырау облысы үшін ІТ мамандар даярлайтын орталықта Құрманғазы, Жылыой, Индер, Қызылқоға, Мақат және Махамбет аудандарының мектеп мұғалімдері білімін шыңдады.
Бұған дейін ІТ орталықта 157 адам даярлықтан өткен.
– ІТ орталығы түлектерінің дені – мұғалімдер мен оқушылар. Олар графикалық және анимациялық бағдарламалармен жұмыс істеу дағдысын үйренді. Сандық сауаттылық (MS Word, MS Excel, MS PowerPoint, интернет ресурстарымен жұмыс жасақтау), Графика және дизайн (Auto Cad, Adobe Photoshop), Web-сайттарды бағдарламалау (HTML, PHP, CSS, CMS), Дизайн және компьютерлік графика (CorelDraw, Adobe Photoshop, AutoCAD, Macromedia Flash, 3d Max), бағдарламалаудың қазіргі заманғы технологиялары (С/С++, Python, Java) бағыттары бойынша оқып, білімдерін кеңейтті. Бүгінгі нәтижелеріміз жақсы көрсеткішке жетіп отыр, – деді Х.Досмұхамедов атындағы Атырау мемлекеттік университетінің IT орталығының жетекшісі Жанна Ғаббасова.
Оның шәкірттері Сергей Кротиков пен Тен Евгений көру қабілеті нашар адамдарға арналған Color Vision түстерді анықтау үшін құрылғы әзірлеген. Оқушылар биыл партияның әлеуметтік жобалар байқауына қатысып, бірінші жүлделі орынға ие болды.
Оқушылар ІТ сыныпта оқып қана қоймай, жоба жасақтап, оны қолданысқа енгізуге мүмкіндік алады. «Цифрлы Қазақстан» – талантты жастардың тың идеясын жүзеге асыруға жол ашып отыр.
Атырау облысы