Қасым-Жомарт Тоқаев елшілердің Қазақстандағы жұмысына табыс тіледі. Расса Джаличандрамен жүздесуде Тайландтағы сайлаудың табысты өтуімен және елдің жаңа Премьер-министрінің сайлануымен құттықтады.
– Қазақстан мен Тайланд барлық салада, соның ішінде саяси, экономикалық және мәдени бағыттарда достық қатынастарды жемісті дамытып келеді. Тайландқа біздің елімізден турис көп барады. Сіздің еліңіз – қазақстандықтардың сүйікті жерлерінің бірі. Екі ел арасындағы өзара қарым-қатынастарды одан ары дамытуға септігіңізді тигізетініңізге сенімдімін, – деді Президент.
Сондай-ақ Юсеф Әбделғанимен кездесуде Қазақстан мен Иордания арасындағы ықпалдастықтың жоғары деңгейде екенін атап өтті.
– Елдеріміз арасындағы қарым-қатынастардың жақсы дамуына Король ІІ Абдалла зор үлес қосты. Бүгінде екіжақты ынтымақтастық өзара достық пен сенім негізінде табысты дамып келеді, – деді Мемлекет басшысы.
Қасым-Жомарт Тоқаев Энрике Мендозамен кездесуде өзара байланыстардың одан ары нығая беретініне сенім білдіріп, дипломатиялық жұмыста табыс тіледі.
– Елші мырза, жаңа қызметіңізбен құттықтаймын. Сіз Қазақстандағы Венесуэланың бірінші Төтенше және өкілетті елшісі болғандықтан, екі тарап үшін де бұл сенім грамотасын тапсыру рәсімінің маңызы зор, – деді Қасым-Жомарт Тоқаев.