Тәуелсіздікке қанат қаққан 1991 жылы болашақ Сарыарқаның төсінде жатқан шағын қалада небәрі 300 мыңға жуық халық бар еді. Шүкір, қазіргі уақытта Нұр-Сұлтан бар алаштың басын қосқан миллион тұрғыны бар шаһарға айналды.
Сайын далаға көшкен сәт
1994 жылдың 6 шілдесінде Нұрсұлтан Назарбаев ел астанасын Алматыдан Ақмолаға көшіру туралы алғаш идеяны Парламент депутаттарының алдында айтты. Астананы солтүстікке қарай мың шақырым қашықтықта жатқан Сарыарқаның сайын даласына көшіру туралы батыл шешім осы кезде қабылданды. Президент өз сөзінде астананы ауыстырудың төрт басты себебіне тоқталған еді. «Біріншіден, Қазақстанды геосаяси жағынан күшейтудің қажеттігінен туындады. Қала төрт тарапқа: оңтүстікке, солтүстікке, батысқа, шығысқа бірдей ашық. Екіншіден, бұл шешімді қабылдағанда қауіпсіздік мәселесі де еске алынды. Тәуелсіз мемлекеттің астанасы мүмкіндігінше сыртқы шекараларынан жырақта және елдің ортасында орналасуы тиіс. Үшіншіден, астананың орнын ауыстыру Қазақстанның экономикасын сауықтыру қажеттігінен де туындады. Төртіншіден, астананы аймаққа қарай көшіре отырып, біз құрамы жағынан көпұлтты, тұрақты полиэтностық мемлекетті құру, Қазақстанды мекендеп отырған халықтардың арасындағы достықты сақтау және нығайту бағытын тағы да дәлелдедік» дегені әлі күнге дейін елдің есінде қалды.
Еркін экономикалық аймақ
1996 жылы Президент Жарлығымен Ақмолада еркін экономикалық аймақ құрылды. Еркін экономикалық аймақ қала құрылысының қарқынды жүруі үшін қаржы тартуда және сол жағалауды игеруде қуатты катализатор болды. Табысты жұмыс нәтижесінде, аймақ жұмысынан түскен табыстың 60 пайызын алып отырды.
1997 жылдың 20 қазанында Нұрсұлтан Назарбаев «Ақмола қаласын Қазақстан Респбуликасының астанасы деп жариялау» туралы Жарлыққа қол қойды. Ал 8 қарашада елордаға еліміздің көк туы, елтаңбасы және Президент байрағы жеткізілді.
Жаңа буын шоғыры
1996 жылы мұнда ең алғаш құрылыс жұмыстары қарқынды жүргізіле бастады. Елдің жаңа астанасында мемлекеттік қызметкерлерге арнап қызметтік пәтерлер көптеп салынды. Елімізде жаңа басқарушылардың легін дайындау қажеттігі мықтап қолға алынды. Осы ретте Президент өзі бас болып, жаңа қалада жаңаша ойлайтын мамандардың жаңа шоғырын қалыптастыруға білек сыбана кірісті.
Әлем картасындағы әйгілі есім
Елорда тарихында 1998 жыл ел астанасы атауының өзгеруімен есте қалды. Қалай болғанда да, жаңа ат ұсынуға келгенде небір ұсыныстар айтылғаны белгілі. Соңғы шешімді Елбасының өзі қабылдады. «Шынын айтқанда, астананың атауын ауыстыру ұдайы ойымнан шықпай, ат іздеумен болдым. Бір жолы түнде, дәлірек айтсам, сағат түнгі екіде Астана деген атау ойыма сап етіп, көкейіме қона кеткені. Астана дегеніміз – астана! Қазақша әдемі естіледі. Қомақты, ауыз толады, қысқа да нұсқа, әуезді. Орысша да, ағылшынша да солай естіледі. Бұл атауда батылдық, мығымдық және айқындық реңк бар. Астана!» деп ағынан жарылған еді. Ал 10 маусым күні жаңа астананың халықаралық тұсаукесері дүркірете тойланды. Бұл күні Қазақстан бүкіл әлемге өзінің жаңа, жас, жасампаз елордасы Астананы таныстырды.
Қазақстан астанасының атауы биыл Нұр-Сұлтан деп өзгерді. Бас қаланың атауын бұлай өзгертуге шешім қабылдау бір күннің ғана әңгімесі емес еді. Мемлекет астанасының атауын Тұңғыш Президент атына ауыстыру жөнінде мұның алдында да бірнеше рет ұсыныс айтылған болатын.
2016 жылы Қазақстан тәуелсіздігінің 25 жылдығына арналған декларацияны талқылау кезінде парламент мүшелері Президент Назарбаевтың есімін мемлекет астанасына беру жайлы ұсыныс айтқан. 2017 жылы депутаттар бұл мәселені тағы да қозғады. Президент Қасым-Жомарт Тоқаев бұл ұсынысқа нүкте қойды.
«Мәңгілік елдің» қақпасы
2011-2019 жылдар аралығында елорданың жеткен жетістіктері көз қуантады. Әлемнің 27 елінен келген мыңнан аса спортшы қатысқан Азияда ойындарының ашылу салтанаты, 2011 жылы «Мәңгілік ел» салтанат қақпасының бой көтеруі, 2012 жылы Орталық Азиядағы ең үлкен «Әзірет Сұлтан» орталық мешітінің ел игілігіне берілуі, 2013 жылы «Астана Опера» театрының тұсаукесері, 2014 жылы Ұлттық мұражайдың ашылуы, 2015 жылы Қазақ хандығының 550 жылдық мерейтойын тойлауы, 2016 жылдың 4 шілдесіне миллионыншы тұрғынның дүниеге келуін қалай айтсақ та жарасады. Күні кеше EXPО – 2017 халықаралық көрмесін ұлы дала төрінде таныстырып, 114 ел мен 14 халықаралық ұйымның басын қосқанымыздың өзі неге тұрады?! Ендеше, елорда тойы қарсаңында ел мұраты жолында жасалған дүниелердің жаршысы болуға жазсын!