Осы іс-шараның аясында көпбалалы аналарға тігін және қолданбалы өнерден тегін шеберлік сағаттары ұйымдастырылды. Қазақстанның түкпір-түкпірінен келген аналар өнерін ортаға салып, үйренгенін көпшілікке паш етті. Атап айтқанда, фестиваль барысындағы байқауда бақ сынауға мүмкіндік алды. Тігін тігуді олар осыған дейін 6-10 маусым аралығында өткен «Асыл ана» семинар-тренингі кезінде үйренген болатын.
Осылайша қолөнерін қауымға ұсынып, көрмеден орын алды. Ал жұмыстарының бағасын беруші – фестиваль тамашалауға келген қонақтар. Аталған іс-шараға Нұр-Сұлтан қаласының әкімі Алтай Көлгінов пен Еңбек және халықты әлеуметтік қорғау министрі Бердібек Сапарбаев қатысты. «Әйел – отбасы мен ошақ қасының берекесін сақтаушы ғана емес, қоғамның айнымас бөлігі. Елдің дамуына да белсенді ат салысады. Бүгінде әйелдердің экономикалық мүмкіндіктері күн сайын кеңейіп келеді. Оған дәлел ретінде нәзік жандылардың шағын және орта бизнес секторындағы белсенділігін келтіруге болады», – деді қала басшысы Алтай Көлгінов.
Шеберлік сағатын «Құрмет» орденінің иегері, белгілі этнодизайнер Ырза Тұрсынзада өткізді. Ол ұлттық, қазақы стильдегі бұйымдар жасайды. Оның жұмыстарымен қазақстандықтардың көпшілігі жақсы таныс. Мұндай маманнан құнды кеңестер алып, құлақ түрген жөн-ақ. Әсіресе, тегін өткізіліп жатқанда мүмкіндікті пайдаланып қалуға әркімнің-ақ таласы да, ынтасы да бар. Өйткені мастер-класс барысында он саусағынан өнер тамған маман шеберлігінің сырларымен бөлісіп, жеке бизнес ашудың тәсілдерін айтудан да аянып қалмады.
Әсіресе, бүгінде әлеуметтік желіні қуатты қару ретінде қолдана білу маңызды. Ырза Тұрсынзада әйелдерге осы туралы да біршама кеңес айтты. Себебі, жасаған бұйымдарды өткізу, сатып алушыға жеткізу үшін де қабілет қажет-ақ. «Ескі салт-дәстүрлерді жаңғырту арқылы Ұлы дала әйелінің бейнесін де жаңартуға мүмкіндік бар деп ойлаймын. Мұндай қайырымдылық шеберлік сағаттарын өткізіп жүргенімізге осымен төрт жылдай уақыт болды. Байқағаным, әйелдерде өзгеріс орасан зор. Жыл өткен сайын шыдамды, дана болып бара жатқандай көрінеді. Қазіргі таңда ұлттық қолөнердің дамуына үлес қосып, кәсібін дөңгелетіп жүрген әйелдер көп. Табыстары да жақсы – 500 мың теңгедей табады. Міне, соларға қарап кез келген әйел табысқа жете алатынын, қаражат табуға мүмкіндігі барын көре аламыз», – дейді Ырза Тұрсынзада. Фестиваль қатысушылары дипломмен марапатталып, 50 әйелге тігін машиналары мен өзге де бағалы сыйлықтар табысталды. Мұндай сыйлық мерекелік көңіл күйді одан әрмен көтергені анық.
Қуаныш САПАРБАЕВ