Елбасының марапатын «Nur Otan» партиясы Павлодар облыстық филиалының төрағасы Әбілқайыр Сқақов табыстады. Марапатталғандардың арасында жеке кәсіпкер және облыстық мәслихат депутаты Гүлмира Нұрханова, «Еріктілер лигасы» облыстық филиалының көшбасшысы Карина Любченко, «Клуб добряков» жетекшісі Асхат Кустаулетов, «Jas Otan» Жастар қанатының облыстық филиалының төрағасы Ғабит Хафиз, студенттік филармонияның қызметкері Бахатхан Оразбек, вокал оқытушысы Сәния Қабдул және блогер Рымбек Қабиден бар.
– Сіздер екі айдан астам уақыт ішінде біздің жерлестерімізге, әсіресе мұқтаж зейнеткерлер мен көмекке зәру отбасыларға, сондай-ақ полицейлерге, дәрігерлер мен әскерилерге көмек көрсете отырып, демалыссыз тыным таппай үлкен жұмыс атқардыңыздар. Жоғары жауапкершілік пен патриотизмнің үлгісін көрсете білген партиялықтарға, «Jas Otan» Жастар қанатының ерікті жастарына, меценаттарға және медицина қызметкерлеріне алғысымды білдіремін, – деді Әбілқайыр Сқақов.
«Nur Otan» партиясы Павлодар облыстық филиалының төрағасы Елбасының бастамасымен құрылған Birgemiz қорының арқасында Павлодар облысының 27 мың тұрғыны 50 мың теңге көлемінде ақшалай көмек алғанын да еске салды. Облыстағы 3,5 мыңға жуық адам осындай материалдық қолдауға ие болғанын, бұдан өзге BizBirgemiz жалпыұлттық акциясы аясында павлодарлық партияластар мұқтаж жандарға қолдау көрсеткенін, олар өңірдің 12 мыңға жуық тұрғынына азық-түлік жиынтығын жеткізгенін тілге тиек етті.
Сондай-ақ павлодарлықтардың қолдауын су тасқынынан зардап шеккен Түркістан облысы Мақтаарал ауданының тұрғындары да сезінді. Партия өкілдері аталған өңірге 40 тонна гуманитарлық көмек, оның ішінде азық-түлік, жеке гигиеналық құралдар және тағы да басқа заттар жөнелтті.
Айта кетейік, осы апта ішінде Нұрсұлтан Назарбаевтың атынан алғысхаттар 3 мың қазақстандыққа табысталады. Олардың ішінде Павлодар облысындағы 100-ге жуық волонтер мен белсенді бар.
