Редакциямызға ел ішінен түрлі мәселе бойынша хабарласатындар өте көп. Әсіресе, ауылдағы ағайынның дені жөнделмеген жолға, ауызсу тапшылығына, көше атауларының дұрыс жазылмауына алаңдайды. «Жел тұрмаса, шөптің басы қимылдамайтынын» білетін қазақ мәселенің түйінін тарқатқысы келеді. Бұл жолда күресіп, талай табалдырықты тоздырған жанашырлар көп. Олардың үні жергілікті билікке жетпегенімен, редакциямызға жетті. Біз, «Әкімге сауал» айдарын ашып, редакцияға хаттарды жариялап отырамыз. Бұған жауапты жергілікті әкімдік береді деген ойдамыз. Ой қосып, пікір білдірем десеңіз – төр сіздікі.
Біз, Жамбыл облысы, Меркі ауданы, Меркі ауылдық округінің тұрғындарымыз. Елбасы Н.Назарбаевтың «Болашаққа бағдар: рухани жаңғыру» мақаласында «Туған жер» бағдарламасы туралы айтылды. Білуімізше, бұл бағдарлама жастардың бойына патриоттық тәрбие ұялатып, олардың туған жерге деген сүйіспеншілігін арттыруға үлкен себеп болды. Өкінішке қарай, бұл бағдарламаның жылы лебі біздің ауылымызды айналып өтті. Ауылымызды көркейтуге қатысты айтар назымыз бар.
Біріншіден, бізге осыдан жеті жыл бұрын жөндеуге уәде етілген жолымыз әлі дұрысталған жоқ. Осыған дейін ауыл тұрғындарының бармаған жері, қақпаған есігі жоқ. Өйткені жолдың кедір-бұдырлығынан тас қараңғыда үйге жету мүмкін болмай қалады. Жауынды күндері балаларымыздың мектепке барып-келуі мұңға айналады.
Алдымен жайымызды ауыл әкімі Ербол Базарбайұлына айттық. Одан нәтиже болмағасын Меркі ауданының әкімі Мейірхан Өмірбековке бардық. Екеуінің де жауабы бір болды. Ауыл әкіміне бірнеше рет, аудан әкіміне екі рет бардық. «Келесі жылы жөнделеді. Міне, жөндейін деп жатырмыз» деген құрғақ уәдеге тойдық. Соңғы рет бізді ауыл әкімінің орынбасары Жасұлан Жұмаханұлы қабылдады. «Енді алты ай шыдаңыздар. Алла қаласа 2020 жылы нақты жөндеп береміз» деді тағы. Біз талай «алты айды» өткердік. Бірақ сол баяғы жауап пен қордаланған мәселеден шаршадық.
Екінші мәселеміз – көшеміздің атауына қатысты боп отыр. Біз тұратын көше Буденный деген ескі атаумен әлі тұр. Негізінде бұл көше Жақсылық болып өзгерген. 2018 жылы Меркі ауылдық округі Меркі ауылындағы Буденный, Стадионный, Заречный көшелерінің атауын өзгерту туралы арнайы №62 шешімі де шыққан болатын. Сонда Меркі ауылдық округі, Меркі ауылындағы Буденный көшесі – Жақсылық боп өзгертілген еді. Бұл өзгерісті естігеніміз болмаса, көшеміздің басында Буденный деген атау әлі жазылып тұр. Жақсылық деген атауды ара-тұра жергілікті мекенжай туралы анықтама алуға барғанда ғана біліп қаламыз. Неге ескі атаудан арылтып, көшеміздің атауын жарқыратып қоймасқа?
Ауылға қатысты түрлі бағдарламалар бар, «Ауыл – ел бесігі» деген жоба бар деп естиміз. Бірақ олардың пайдасы қайда? Неге жергілікті билік ауылдың көркейіп, гүлденуіне, оның жолының жөнделіп, халықтың тұрмыс-тіршілігінің жақсаруына мүдделі емес? Біз осы сауалдарымызға жауап алғымыз келеді.
Бір топ
ауыл тұрғындарының атынан
Гүлнар ҚАЛАБАЕВА,