Қызылорда қаласында өткен «Қазақстанның үздік тауары» жыл сайынғы өңірлік көрме-конкурсында қазалылық жеке кәсіпкер Гүлзат Билсариева «Халық тұтынатын үздік тауарлар» номинациясы бойынша жеңімпаз атанды.
«Бастау-Бизнес» жобасымен оқу курсын аяқтап, кәсібін бастаған Гүлзат түрлі матадан әйелдерге арналған сәнді көйлектер тігумен айналысады. Кәсіпорнында білікті тігіншілер жұмыс істейді. Аз уақыт ішінде сапалы әрі сәнді киім үлгілерін тігу арқылы тұтынушыларының саны артып, тауары сұранысқа ие бола бастаған кәсіпкер алдағы уақытта цехты ұлғайтып, басқа да киім үлгілерін тігуді жоспарлап отыр.
Айта кетейік, өңірлік кәсіпкерлер палатасының ұйымдастыруымен өткен шараға Қазалы ауданынан «РЗА» АҚ-ның сүт өнімдері, өзінің тігін бұйымдарымен Шакарбан Тұрғанбаева, әйелдерге арналған сәнді көйлектерімен жас кәсіпкер Ақбота Есекей, түрлі дизайндағы бас киімдерімен Әзима Дүрхан, «Томпи» попкорн өнімдерімен Гүлсая Құтжанова, кондитерлік өнімдерімен Шарапат Жаңагүл қатысты.
Эльмира АҒАБЕК