Солтүстік және Оңтүстік Кореяны қосқанда жеті елге баратын халықаралық «Зов предков – 2019» автошеруі жексенбі күні Атырау қаласына аялдап, Достық үйінде кездесу өткізді.
Атырау қаласындағы Достық үйі алдында автошеруге қатысушыларды қала басшылығы, мен қала тұрғындары, аймақтағы әр ұлттың өкілдері сән-салтанатпен қарсы алды.Ұзақ жол-сапарға шыққан автошеру керуені мүшелерімен кездесуде Атырау қаласы әкімінің орынбасары Ұлықбек Тналиев қатысушыларға өңірімізге келгендері үшін алғысын айтып, ризашылығын білдірді.
– Атырау – еліміздің мұнайлы астанасы. Елімізде әртүрлі ұлттың өкілдері ынтымақтастықта өмір сүріп келеді. Бүгінгі автошерудің мақсаты да елдердің ара-қатынасын нығайту және халықаралық байланыстарды арттыру. Алдағы автошеруде жолдарыңыз болсын, – деген қала шаһары басшысының орынбасары Ұлықбек Тналиев автошеруге қатысушыларды құттықтап, сәт сапар тіледі.
Халықаралық автошеру Ресей халықтарының ассамблеясы және жалпыресейлік қоғамдық ұйымдардың ұйымдастыруымен Мәскеу қаласынан бастау алған болатын.
Бұл шеру Мәскеу – Ташкент – Нұрсұлтан – Ұлан-Батор – Пхеньян – Пекин – Сеул – Мәскеу бағыты бойынша жүреді. Автошерудің негізгі мақсаты – ел халықтарының бірлігін және халықаралық байланысты нығайту.
Автошеруге қатысушылар, әр елдің даму сатысын, тұрғылықты халқының тұрмысы мен салт-дәстүрімен таныс болып, салыстырмалы түрде зерделеп, адами қасиеттеріне баға беріп отырады. Өйткені қазақстанның қай аймағы да қонақжайлығымен, салт-дәстүрінің ерекшелігімен есте қалады. Оны автошеруге қатысушылардың өздері де айтты.
Автошеруге қатысушы «Единство» журналының бас редакторы Александр Шин ыстық ықыласпен күтіп алған Атырау жұртшылығына алғысын білдірді.
– Автошеруге қатысу – мен үшін үлкен мәртебе. Ұзақ жолда жүру оңай емес, дегенмен жолымызда әртүрлі қызықты жайттар кездесті. Атырау өңіріне де келіп жетіп, қонақжайлыққа куә болып жатырмыз. Күтіп алғандарыңыз үшін рақметімізді айтамыз деді, – Александр Шин.
Автошеру 9 шілде күні Мәскеу қаласынан бастау алып, 10 автокөлікпен 30 мың шақырымды жүріп өтуді мақсат етіп жолға шықты.
Атырау облысы