Шымкент қаласындағы «Көрме орталығында» «Қазақстанның үздік тауары» аймақтық көрме-байқауы және «Оңтүстік өнімдері» атты көрме-жәрмеңкесі өтті.
Көрмеге мегаполистегі тамақ, дәрі-дәрмек, машина жасау, химия, жеңіл өнеркәсіп пен құрылыс, ауыл шаруашылығы саласына қажетті өнімдер өндіретін жүзден астам отандық тауар өндіруші компаниялар қатысып, өз өнімдерін көпшіліктің назарына ұсынды.
Шараны жергілікті тауар өндірушілерді қолдау мақсатында Шымкент қаласы әкімдігі мен кәсіпкерлер палатасы ұйымдастырған.
Шымкент қаласы әкімінің орынбасары Г.Құрманбекова мен қалалық «Атамекен» кәсіпкерлер палатасы өңірлік кеңесінің төрағасы Қ.Молдасейітов бастаған топ көрші облыстардан келген кәсіпкерлер мен компания басшыларын және жергілікті сауда желілерінің өкілдерін көрмеге қойылған отандық өнімдермен таныстырды.
Көрме-жәрмеңкенің ашылу салтанатында сөз алған қала әкімінің орынбасары миллионнан астам тұрғыны бар мегаполис мәртебесін алғалы алғаш рет өткізіліп отырған Шымкенттегі бұл шараның маңызына тоқталды. «Қаламызда «Үдемелі индустриалды-инновациялық даму» бағдарламасы аясында 75 млрд теңгені құрайтын 18 жоба іске асты. Бүгінде онда 2 000-нан астам жұмыс орны құрылды. Өткізіліп отырған көрме-байқауда отандық тауар өндірушілер 3 номинация бойынша жеңімпаз атанып, республикалық байқауға жолдама алады. Қонақтарды отандық тауарларды белсенді түрде сатып алуға шақырамыз. Осылайша, жергілікті кәсіпкерлердің қанатын кеңге жаюына мүмкіндік туғызамыз», – деді Гүлнар Құрманбекова. Ал «Атамекен» кәсіпкерлер палатасы өңірлік кеңесінің төрағасы Қ.Молдасейітов бизнес бастаймын деп талпынған әрбір кәсіпкерге мейілінше көмек қолын созған жергілікті билікке алғысын білдірді. Сондай-ақ бәсекелес бар жерде тауардың да сапасы жоғары, ал бағасы қолжетімді болатыны туралы айта келе, кәсіпкерлердің бәсекелестіктен қорықпау қажетін тілге тиек етті.
Қалалық кәсіпкерлер палатасының директоры Н.Қабыштаев жыл сайын болатын дәстүрлі конкурстың биылғы ерекшелігі – қызмет көрсету саласына ден қойған кәсіп иелерінің де шақырылуында деп атап өтті. Сондай-ақ кәсіпкерлік палатасы тарапынан тауар өндірушілердің мемлекеттік сатып алу жұмыстарына көңіл бөлінбек.
Аталған шарада «Фиркан», «Магнум», «Имран» және «Рахмет» сынды желілік сауда орындарының басшылығы жергілікті кәсіпкерлермен келісімшартқа отырды.
Сондай-ақ жиын соңында «Халық тұтынатын үздік тауарлар», «Өндірістік мақсаттағы үздік тауарлар», «Үздік азық-түлік тауарлары» аталымдары бойынша жеңімпаздар анықталып, оларға жыл соңында елордада өтетін «Қазақстанның үздік тауары» республикалық байқауына қатысуға жолдама берілді.
Е.МҰРАТБЕК,
Шымкент қаласы