Құрамында Мәжіліс депутаттары Серік Құсайынов, Сапар Ахметов, Сергей Звольский және Мұрат Теміржанов бар депутаттық топ ел өңірлеріне жұмыс сапары барысында Алматы облысына да арнайы ат басын бұрды. Қазақстан Президеті жанындағы мемлекеттік басқару академиясының Алматы облысы бойынша филиалында болып, жергілікті атқарушы орган қызметкерлерімен кездесті.
Депутаттар жүздесуге жиналғандар алдында Мемлекет басшысы Қасым-Жомарт Тоқаевтың сайлауалды бағдарламасындағы басымдыққа ие бағыттар жайлы жан-жақты әңгіме қозғап, оларды жүзеге асыру үшін қандай жұмыстар атқарылып жатқаны және алдағы кезде қолға алынатыны жөніндегі ойларымен бөлісті.
– Барша қазақстандықтарды лайықты өмір сүру мен ұрпағымыздың жарқын болашағы үшін бірігуге және жұдырықтай жұмылып жұмыс істеуге шақырамыз. Сабақтастық, Әділдік және Өрлеу қағидаттарын ұстана отырып, елдегі барлық азаматтардың әл-ауқатын арттыруға жұмыла кірісіп, күш саламыз. Біз Қазақстанның әр азаматына тең мүмкіндік туғызатын әділетті, дамыған қоғам құрамыз, – деді Мәжіліс депутаты Сапар Қайратұлы.
Депутаттық топ сапары соңғы жылдары жетістіктерімен жұрт аузына ілігіп жүрген «Кәрімов» жеке кәсіпкерлігінің Көксу ауданының орталығы Балпық би кенті жанында орналасқан заманауи сүт-тауарлы фермасында жалғасты.
Жеке кәсіпкер Рахым Кәрімов фермада өндірілетін сүт өнімдерімен таныстырып, зауыттың өндірістік қуаты жайында баяндады.
Аталған сүт-тауарлы фермасы 2017 жылы құрылғанына қарамастан, бүгінде бұл кәсіпорынның сүт өнімдері тұтынушыларын тауып, жұрт көңілінен шығып отыр. Фермада 164 сауын сиыр бар. Ферма қоражайларының сыйымдылығы 400 бас екенін ескерсек, болашақта мал саны арта түспек. Зауытта 65 адам еңбек етеді.
Халық қалаулылары кәсіпкер азаматтың еңбегіне оң баға беріп, алдағы уақытта өнім түрлерін арттырып, сапаны жақсарта түсуді назарда ұстауды өтінді.
– Жетісу өңірінің ауыл шаруашылығы саласындағы қазіргі жетістігі өте жақсы болса, болашағы бүгінгіден де зор. Елбасының «Қазақстанның үшінші жаңғыруы: жаһандық бәсекеге қабілеттілік» атты Жолдауында белгіленген меженің бірі – кәсіпкерлікті қолдау және кооперативтер құру мәселесі екенін жақсы білеміз. Алдағы кезде осы бағыттағы жұмысты барынша күшейткен жөн. Біз бүгін жұмысын көрген сүт-тауарлы ферма сынды кәсіпорындар қатары артатындығына, жаңа жобаларды жатсынбайтын, сапалы әрі табиғи өнімдер өндіруге бел буған осындай кәсіпкер азаматтар ел арасынан көптеп шығатынына сенімдімін, – дейді депутат Серік Досымханұлы.
Болат АБАҒАН
Алматы облысы