Денсаулық сақтау министрлігі Сапа бақылау және тауарлар қауіпсіздігі комитетінің өкілдері неге 553 миллион теңгеге көлік сатып алғанын түсіндірді.
"Мемлекет басшысының ұлттық санитарлық-эпидемиологиялық қызметті күшейту туралы тапсырмасына сәйкес, ұйымды материалдық-техникалық жарақтандыру 2020 жылдың соңына дейін экономикалық өсімді қалпына келтіру бойынша денсаулық сақтау жүйесін жетілдіру жөніндегі іс-шаралар жоспарына енгізілді", - деді комитеттегілер.
Ведомство мәліметінше, көлік комитеттің 18 аумақтық департаментінің 224 аудандық басқармасы бар мамандары үшін, яғни елдің санитарлық-эпидемиологиялық қызметі үшін сатып алынады.
«Соңғы 8-10 жылда санэпидқызметтің автопаркі жаңаланған жоқ. Бүгінде автопарктің 90 пайызы 100 пайызға тозығы жеткен. Коронавирус инфекциясының пандемиясына байланысты COVID-19-бен күрес үшін арнайы автокөлікке жіті қажеттілік туындады», - деп толықтырды комитеттен.
Еске салайық, мұның алдында БАҚ өкілдері комитеттің 553 799 400 теңгеге 140 автокөлік сатып алуға дайындалып жатқанын хабарлаған болатын.
