Осыдан үш жыл бұрын жұмысын бастаған Жамбыл облысының «Нақты көмек мүгедектер қоғамы» қоғамдық бірлестігі негізінен аймақтағы мүмкіндігі шектеулі жандарға көмек көрсетеді. Олардың үй жағдайында қарап отырмай қолынан келетін ісімен айналысып және қосымша мамандық алып, жұмысқа тұруына ықпал етіп келеді.
Қоғамдық бірлестік президенті Шолпан Ахметова – еңбек жолын сауда саласына арнаған адам. Өзі үшінші топтағы мүмкіндігі шектеулі жан. Алайда жұмыс десе қарап отыра алмайтын қарапайым еңбек адамы, өзі секілді мүмкіндігі шектеулі жандардың екі қолға бір күрек таба алмай, қарап отырғанын жаны қаламай өз жобасын бастап кеткен еді. Ал қоғамдық бірлестік жұмысының үздіксіз жүруіне мұрындық болып отырған Nur Otan партиясы Жамбыл облыстық филиалының өкілдері «Кедергісіз келешек» партиялық жобасы арқылы үнемі көмек көрсетіп отырады. Сондықтан Шолпан Ахметова кейінгі екі жыл көлемінде Жамбыл облысы әкімдігінің жұмыспен қамтуды үйлестіру және жұмыспен қамту басқармасы тарапынан лоттарға қатысып келеді. «Жартылай стационар жағдайында Тараздағы мүмкіндігі шектеулі азаматтарды пішу және тігу, фектинг (киіз басу), қолөнер, тоқыма, құрақ құрауға оқыту арқылы жұмысқа орналастыру» жобасымен мемлекеттік әлеуметтік тапсырыс аясында азаматтарға қосымша білім беріп келеді. Мұнда облыс орталығындағы І және ІІ топтағы мүмкіндігі шектеулі азаматтар білім алуда.
– Кейде бір істі бастасаң, алдымен үлкен кедергілерге кез боласың. Бірақ, мен өз ісімді бастағалы Nur Otan партиясы облыстық филиалы көп көмектесті. Алдымен ісімді жүргізіп, кәсібімді дөңгелету үшін сала мамандарынан құқықтық кеңес алу керек болды. Партия қызметкерлерінің көмегімен кәсіпті меңгерген мамандардың басын қосып, ақыл-кеңес алдым. Біздегі азаматтардың дені мүмкіндігі шектеулі азаматтар болған соң, оларды жұмысқа орналастыруда кедергі көп. Ондай жағдайда Nur Otan партиясы облыстық филиалы көмектеседі. Бұдан бөлек, бізде білім алатындардың жасы 18-65 аралығында. Біз, негізінен, тоқыма, қолөнерге баулығандықтан, олар қолынан шыққан бұйымдарын әртүрлі жәрмеңке мен көрмелерге қоюға ынталы. Облыс орталығында ұйымдастырылып жатқан әртүрлі шараларға да қатысып, бұйымын өткізгісі келеді. Мұндай жағдайда аймақтағы нұротандықтар біздің өтінішімізді жерге тастамай, қолдап отырады. Өткен жылы ғана Нұр-Сұлтан қаласында өткен ауқымды жәрмеңкеге қатысып қайттық, – дейді Шолпан Ахметова.
Өткен жылы 40-қа жуық мүмкіндігі шектеулі азамат осы бірлестік ұсынған жоба арқылы білім алып, тұрақты жұмысқа тұрмаса да, қолдан тоқыған бұйымдарын көрмелерге қойып, нәпақа тауып отыр. Биыл 20 азамат білім алуда. Оқу мерзімі – жеті ай. Ендігі жерде қоғамдық бірлестік жаңа жобаларымен, ұсыныспен шығуға бастамалар көтеріп отыр. Өйткені, бірлестіктің әлеуеті оған толық жетеді. Республикалық «Нұр Шуақ» байқауының жеңімпазы, өткен жылы аймақта өткен үкіметтік емес ұйымдардың «Азаматтық қоғам және мемлекеттік әріптестік пен жауапкершілік» аймақтық форумында облыстағы азаматтық қоғам рөлін нығайтуға қосқан үлесі үшін арнайы марапатқа ие болған Шолпан Ахметованың бұл белсенділігін қарапайым еңбек адамының жанкештілігі деген абзал болар. Ол төрт азаматты тұрақты жұмыспен қамтып отыр. Биылғы жеткен жетістіктерін еселей отырып, алдағы жылы да тың бастамаларын жүзеге асырмақ.
Жамбыл облысы