Күні кеше ғана мемлекеттік оқу гранттарының иегерлері анықталды. Биыл былтырға қарағанда жастарға мол мүмкіндік берілгенімен, тізімнен өз аты-жөнін таппаған талапкерлер де бар. Бұған себеп – түлектердің грант аз бөлінетін мамандықтарды көбірек таңдап, бәсекенің жоғары болғандығы.
Дегенмен олар тегін оқудан әлі де үміт үзбеуіне болады. Енді 5 тамыздан бастап Ұлттық қор есебінен көпбалалы және мемлекеттік атаулы әлеуметтік көмек алуға құқығы бар отбасылардың балалары үшін республикалық трансферттен бөлінген 5000 грант үшін конкурсқа құжат қабылданады.
Көпбалалы отбасылардың балалары үшін берілетін қосымша білім беру гранттары қалай бөлінеді? Міне, қазір көпшілікті мазалаған сауал – осы. Өңірлік коммуникациялар қызметінде өткен брифингте облыс әкімінің орынбасары Сұлушаш Құрманбекова республика бойынша бөлінген 5000 гранттың 460-ы біздің облысқа тиесілі екенін айтты. Оның 72-сі – педагогикалық, 388-і ақпараттық-коммуникациялық технологиялар, инженерлік, өңдеу және құрылыс, ауыл шаруашылығы және биоресурстар саласына бөлініп отыр.
– Облыс әкімдігі жанынан құрылған конкурстық комиссия берілетін білім беру гранттарын мамандықтар бойынша орналастыратын жоғары оқу орындарын анықтады. Көпбалалы отбасылардан шыққан мектеп түлектері жергілікті атқарушы органдар өткізетін конкурсқа қатыса алады. Құжат 5-10 тамыз аралығында қабылданады. Қай жоғары оқу орны қандай мамандықтар бойынша құжат қабылдайтыны облыстық қоғамдық кеңестің қорытындысына сәйкес белгілі болады. Қорытындысы облыс әкімдігінің және білім басқармасының ресми сайттарында жарияланады. Құжаттарды белгіленген оқу орындары қабылдайды, – деді Сұлушаш Сәтбекқызы.
Білім гранттары – жастар үшін қуатты әлеуметтік лифт екені сөзсіз. Соның арқасында жыл сайын мектеп бітіретін түлектің тең жартысы елімізде тегін жоғары білім алу мүмкіндігіне ие болып отыр. Бұл қадам оқу мен еңбек процесінен тыс қалғандар қатарының көбейіп кетпеуіне септігін тигізіп отыр. Осы арқылы экономиканың әр саласындағы маман тапшылығы жойылуда. Биыл өңірімізде жергілікті бюджеттен еңбек нарығының қажеттіліктерін ескере отырып, жалпы медицина саласына – 15, агрономия мамандығына – 10, аграрлық техника және технология мамандығына – 5, денсаулық сақтау саласы бойынша резидентураға 9 грант бөлінуі – соның бір көрінісі.
Брифингте облыс әкімінің орынбасары өзгермелі қоғамдағы жаңғыруларды қабылдау үшін сана ашықтығын қалыптастыру керегіне тоқталды. Жалпы, мемлекеттің әлеуметтік саясатының көп тармағының бірқатары жастарды қолдауға, ана мен баланы қорғауға, отбасылық құндылықтарды сақтауға бағытталғаны белгілі.
Биыл өңірімізде жергілікті бюджеттен еңбек нарығының қажеттіліктерін ескере отырып, жалпы медицина саласына – 15, агрономия мамандығына – 10, аграрлық техника және технология мамандығына – 5, денсаулық сақтау саласы бойынша резидентураға 9 грант бөлінуі – соның бір көрінісі.
Биыл Жастар жылына орай елімізде жастарға кәсіпкерлікпен айналысуға гранттар бөлінеді. Өз ісін ашамын деген талапшылдарды қолдау мақсатында облыс әкімдігі өңірлік кәсіпкерлер палатасымен бірлесе отырып, жоспарлы жұмыстар жүргізуде. 15 мамыр-3 шілде аралығында «Бизнес – бастау» жобасымен 437 жас кәсіпкерлік негізіне оқытылып, 50 жас 230,8 миллион теңге шағын несие алған.
– «Бизнестің жол картасы – 2020» мемлекеттік бағдарламасы аясында жастардың жаңа бизнес идеяларын іске асыру үшін 3 миллион теңгеге дейін мемлекеттік грант беруге облыстық бюджеттен 303 миллион теңге, республикалық бюджеттен 21 миллион теңге, барлығы 324 миллион теңге қаржы бөлінді. Аталған грант бойынша 1-12 шілде аралығында конкурс өткізілді. Арнайы құрылған комиссия аудандар мен Тараз қаласынан ұсынылған 466 жастың жобасын қарап, соның 158-іне грант бөлу туралы шешім қабылдады. Жастар жылына орай «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы» шеңберінде жаңа бизнес идеяларды дамытуға республикалық бюджеттен 200 айлық есептік көрсеткіш мөлшерінде 329 жасқа қайтарымсыз грант ретінде 166,1 миллион теңге қаржы бөлінген. Қазір соның 88-іне жаңа жобаларын жүзеге асыруға 44,4 миллион теңге қаржы берілді. Алдағы уақытта осы мақсатқа 800 жасқа 404 миллион теңге көлемінде қосымша қаржы бөлінеді, – деді облыс әкімінің орынбасары.
Сұлушаш Сәтбекқызы брифингте жасөспірімдер тәрбиесіне қатысты, жеткіншектер арасындағы құқықбұзушылықтың алдын алу бағытында жүргізіліп жатқан жұмыстарға да тоқталып өтті. Жалпы бұл тақырып құндылықтары өзгерген қоғамда өте өзекті мәселеге айналған. Кемшілік те, олқылық та бар. Дегенмен тиісті сала мамандары жұмысты тиісті деңгейде жүргізбей отыр деп кінә арта салудан аулақпыз. Қай кезде де баланың тұлға ретінде қалыптасуына алдымен отбасы, ата-анасы, өскен ортасы әсер ететінін ескерсек, бұл – қоғам болып бірге атқаратын үлкен идеологиялық жұмыс.
Елбасы ұсынған «Рухани жаңғыру» бағдарламасы сананы жаңғыртып, идеологиялық жұмысты бекемдей түсуді көздейді. Өңірімізде бұл бағытта жұмыстар облыс әкімі бекіткен арнайы іс-шаралар жоспарына сәйкес жүргізілуде. Бағдарлама «Бәсекеге қабілет», «Прагматизм», «Ұлттық бірегейлікті сақтау», «Білімнің салтанат құруы», «Қазақстанның революциялық емес, эволюциялық дамуы», «Сананың ашықтығы» атты негізгі бағыттардан тұратыны мәлім.
Осы бағыттардан туындайтын «Қазақ тілін латын әліпбиіне көшіру», «100 жаңа оқулық», «Туған жер», «Қазақтанның киелі жерлерінің географиясы», «Жаһандағы заманауи қазақстандық мәдениет», «100 жаңа есім», «Ауыл – ел бесігі» арнайы жобаларын іске асыру мақсатында жыл басында «Рухани жаңғыру» жобалық офисі құрылды. Ал «Ұлы даланың жеті қыры» жобасын іске асыру бойынша 21 қаңтарда облыстық іс-шаралар жоспары бекітілген. Соған сәйкес 926 миллион теңгеге 278 мыңнан астам адам қамтылған 59 жоба, 720 іс-шара (жергілікті бюджеттен – 88 миллион теңге, демеушілер есебінен 838 миллион теңге) өткізілді.
Сұлушаш Сәтбекқызының айтуынша, облыстың 80 жылдық мерейтойы қарсаңында Шахристан кешенінде облыстық тарихи-өлкетану музейі, көрме павильоны, амфитеатр, қолөнер шеберлерінің галереясы, «Руханият» орталығының жаңа ғимараты, көркемдік-бейнелеу өнері галереясын ашу жоспарланып отыр екен. Сондай-ақ өңірдің тарихы мен мәдениеті, табиғаты, біртуар перзенттері мен ақын-жыршы, батырларының есімдерін ұрпақ жадында жаңғырту мақсатында «Тараз мұралары» сериясымен көптомдық шығарылмақшы.
– Бүгінгі күні бұл жұмыс 2 бағытта жүріп жатыр. Біріншісі бойынша – 15, екінші бағытта 35 томдықтың материалдары топтастырылып дайындалды. Оның алғашқысы – тарихи-танымдылық ғылыми-зерттеулер. 35 том шығармашылық жұмыстарға арналған. Сондай-ақ облысымыздан шыққан өнер жұлдыздарының концерті, «Өркениеттер тоғысындағы Тараз» атты халықаралық ғылыми-практикалық конференция өткізу жоспарланып отыр. Бұдан бөлек көптеген іс-шаралар бар, – деді Сұлушаш Құрманбекова.
Жамбыл облысы