Қазақ елінің басты байлығы – халық. Ал халық тілегі – тыныштық пен әділдік. Осы ретте, халықтың бұл тілегін орындап, әділеттілікті ту етіп, аққа жақ болып жүрген сақшылардың қызметін ерекше атап өткен жөн. Ісіне адал сақшылар бүгінде қызметте қырағылық танытып, азаматтардың өмірін оттан да, судан да құтқарып жүр. Сонымен қатар түрлі қауіп-қатер, зорлық-зомбылық, ұрлық-қарлық жағдайында да полиция қызметкерлері қиындық пен қатерге қайыспай, қоғамдық тәртіпті сақтау үшін аянбайды.
Жүгі ауыр, жауапкершілігі мол қызмет иелері халық қауіпсіздігін қамтамасыз етіп, азаматтардың құқығын қорғауды басты миссиялары санайды. Бүгінде ел тыныштығын абыроймен сақтап жүрген сақшылардың ерлігі ауыз толтырып айтарлықтай. Оған қарапайым халықтың алғысы куә.
Мысалы, сондай алғысқа Петропавл стансасындағы Желілік полиция бөлімінің қызметкерлері Александр Снежков, Хасан Магомедов, Жеңіс Ақылтаев және Ырысбек Жолай ие болған. Алғыс білдіруші – Татьяна Андрейченко есімді қала тұрғыны. Ол биылғы жылдың 29 шілдесінде вокзал маңындағы дүкеннің бірінде орналасқан терминалдан ақша алып, әмиянына салады. Бірақ әмиянды сол жерде ұмытып кетеді. Әмиянды ұмыт қалдырғанын Татьяна Сергеевна үйіне жеткен соң ғана білген. Іле-шала дүкенге қайтып келсе, терминал маңында бос жатқан әмиянды көреді.
– Көңіл күйім бірден құлазып кетті. Себебі, барлық отбасылық қаражат әмиянда болатын. Дереу «102» нөміріне қоңырау шалып, полиция қызметкерлерін шақырдым. Олар жетемін дегенше, осы маңда рейд жүргізіп жүрген Петропавл стансасындағы Желілік полиция бөлімінің қызметкерлері көмекке келіп үлгерді. Олар мән-жайды біліп, дереу іске кірісті. Дүкенге кіріп, бейнежазбаларды қарай бастады. Осы сәтте «102» нөмірімен шақырған полиция қызметкерлері де келіп, өтініш жазу үшін мені полиция учаскесіне алып кетті, – дейді Т.Андрейченко.
Желілік полиция қызметкерлері жедел әрекет етудің нәтижесінде, оңай олжаға қызыққандарды бірден тауып алған. ЖПб-нің жоғарыда аталып өткен 4 қызметкері 10 минут ішінде бұл істің анық-қанығына жеткен екен. Бейнежазбаның көмегімен ақшаны қолды қылған адамды дереу анықтаған олар Татьяна Андрейченкоға хабарласқан.
– Арада 10 минуттай уақыт өткен соң, ұялы телефоныма ЖПб-нің қызметкерлері хабарласты. Олар әмияннан ақша алған адамдарды анықтап, ұстағандарын жеткізді. Бастапқыда сенер-сенбесімді білмедім. Ақша ұрлағандарды алдыма алып-келіп, барлық қаражатты толығымен қайтартты. Өте қуаныштымын. Ең бастысы, менің өтінішіме жіті мән беріп, оның оңтайлы шешілуіне ықпал еткен көлік сақшыларына және департамент бастығы, полиция полковнигі Аманжол Қабыловқа алғысым шексіз – дейді ол.
Бұл – келтірілген мысалдың біреуі ғана. Шын мәнінде, полиция қызметкерлері жұмыс барысында түрлі қылмыс пен ұрлықтың басы-қасында жүріп, қызметін адал атқарады. Ал қарапайым халықтың осындай алғысы оларға күш-жігер беретіні анық.