Тәуелсіздігімізді баянды ету барлық ұлтты, мемлекетті нығайтуға жұмылдыру арқылы, ынтымақтастық арқылы жүзеге асады. Ал сол идеологияның басты діңгегі – патриотизм. Жастары мықты қоғамда өміршең, нақты мақсаттары бар ұтымды мінез-құлықтың прагматизмі жоғарылайды. Бұл орайда идеология нақты межелерден туындаған бағдарлы шынайы қажеттілікке жауап беріп қана қоймай, қоғамдық санаға, адамдардың ақыл-ойына ықпал ете алады.
Қоғам қажеттілігін өтей алатын идеология қоғамды алға сүйрейді, жайлы әлеуметтік мінез-құлық қалыптастыруға септігін тигізеді. Бұл тұста ұлтаралық келісімнің алар орны ерекше. Осылайша, демократиялық процестер өрбіп, қоғамда ынтымақ, ауызбіршілік үйлесім тауып, мемлекеттік тәртіпке бойсұнады.
Қоғамдағы түрлі әлеуметтік топтарды тәуелсіздік идеясының төңірегіне шоғырландыру қазақстандықтарды отаншылдыққа тәрбиелеу мәселесімен тікелей байланысты. Жастардың бойындағы патриоттық имунитетті нығайтудың негізгі жолы оларды отаншылдыққа баулу арқылы жүзеге асады. Ақиқатында патриоттық иммунитет барлығымыздың бойымыздан табылады. Бірақ ол бұл күнде қандай деңгейде екенін дөп басып айту қиын. Ол қалай, қандай жағдайларда, қай кездерде жақсы дамиды? Оған қандай күштер әсер ете алады?
Жақында Арыста болған жарылыс жерді де, елді де дүр сілкіндірді. Бір сөзбен айтқанда, ешкімді бейжай қалдырмады. Адамдар жапа-тармағай үй жайын, дүние-мүлкін тастап жан сауғалап кетті. Жолда кезіккен көлікке мініп, Арыстан кетудің амалын қарастырды.
Әрине, адам өмірі, адам қауіпсіздігі қашанда бірінші орында. Біз тұрғындарды басқа елдімекендерге уақытша көшіру кезінде талай жайтқа куә болдық. Жарылыс басталған кезде «Алтын Тұмар» балабақшасының қызметкерлерінің балабақшадағы 112 сәбиді дер кезінде ғимараттан алып шығып, аман сақтап қалғаны адам бойында жауапкершіліктің ғана емес мейірімнің, адамгершілік, жанашырлық сезімдерінің жоғалмағанын анық көрсетті. Ешкім өз басын, отбасын ойламады. Олардың ойларында тездетіп балаларды қауіпсіз жерге орналастыру ғана болды. Әйтпесе, сол қызметкерлердің де бала-шағасы бары белгілі. Балабақшада бар жоғы екі-ақ автокөлік болды. Соған қарамастан әрбір қызметкер үш-төрт баладан жетектеп, кейбіреулері Шымкенттегі ағайындарының үйінде, ендібіреулері мектептерде уақытша балалармен бірге болған. Кейіннен барлық балалар түгелімен ата-аналарымен қауышты. Ата-аналардың балабақша ұжымына айтар алғысы шексіз. Осы оқиға біздің халықтың бойындағы патриоттық иммунитеттің мықты екенін, қиын жағдайларда барлығы бірауыздан көтеріле түсетінін, бірлігі мықты екенін байқатты.
Жарылыс басталған кезде «Алтын Тұмар» балабақшасының қызметкерлерінің балабақшадағы 112 сәбиді дер кезінде ғимараттан алып шығып, аман сақтап қалғаны адам бойында жауапкершіліктің ғана емес мейірімнің, адамгершілік, жанашырлық сезімдерінің жоғалмағанын анық көрсетті. Ешкім өз басын, отбасын ойламады. Олардың ойларында тездетіп балаларды қауіпсіз жерге орналастыру ғана болды.
Тұрғындар арасында ішінара жағымсыз психологиялық ахуалдар да пайда болды. Тұрғындардың эмоционалды тұрақтылығына қол жеткізу үшін билік өзара үйлесімді қатынас орната бастады. Барлық кедергілер зерттелді. Басшылық көпшіліктің пікірімен санасып, жұмыла іске көшті. Елдің барлық түкпірінен көмек қолы созылды. Вагон-вагондап заттар келді. Қаржылай көмек қамқорлық шотына түсіп жатты. Арыс қаласын қалпына келтіру үшін қала 17 секторға бөлініп, әр секторға облыстар бекітіліп, іс-шаралар басталып кетті. 55 602 тұрғынға 100 мың теңгеден 5,6 млрд теңге өтемақы үйлестірілді. Кәсіпкерлерге «Ырыс» микроқаржы ұйымы тарапынан «Қамқор» бағдарламасы бойынша 1%-дық жеңілдетілген сыйақымен әр кәсіпкерге 48 айға 5 млн теңгеге дейін кепілсіз несие қарастырылып, қазіргі уақытта 70 млн теңге көлемінде несие алуға 14 кәсіпкердің құжаттары жинақталып, несие комитетіне жіберілді. Арыстық 4 010 баланы жазғы демалыс лагерьлеріне демалдыру жоспарланып, қазіргі уақытта 3 800-ден астам бала қамтылды. Одан бөлек Арыстағы 3 900 зейнеткердің барлығы дерлік облыс аумағындағы ардагерлер үйіне орналастыру жоспарланды.
Осылайша, Түркістан облысының әкімі Өмірзақ Шөкеев Арыста жайлы психологиялық ахуалдың қалыптасуы үшін рационалды әдістерді пайдаланып, уақытша орын алған жағдайды тиімді шешудің жолдарын қарастырды. Алғашқы аптада тұрғындар арасында түрлі түсінбеушіліктер болды. Халық көп жиналған бір кездесуде Өмірзақ Естайұлының арыстықтарға «Мен сіздермен бірге Арыста тұрамын» деген бірауыз жүйелі сөзі толқуға себілген судай халықтың бойындағы сенімсіздікті сейілтті, шиеленістің кілтін тауып, құлпын ашты. Бірауыз сөздің салмағы басым болды. Жүректе сенім пайда болып, арыстықтар қайтадан үйлеріне оралды. Ал Nur Otan партиясы Төрағасының Бірінші орынбасары Бауыржан Байбек алғашқы жұмыс күні қайнаған Арысқа келіп, партияның қамқорлық керуендерін күтіп алып, зардап шеккен тұрғындармен кездесті. Олардың ұсыныс-пікірлеріне құлақ асып, жедел қимыл-әрекеттің көркем үлгісін көрсетті. Содан бері Арысты қалпына келтіру шаралары партияның басты назарында. Партияның көзқарастар жүйесі тағы салмақтана түсіп, қамқорлық, бірлік, ынтымақтастық идеясының төңірегіне ел шоғырланып көмек қолы созылды.
Қорыта айтқанда, бірлігі бекем, мақсаты айқын Nur Otan партиясының ел үшін жасаған игі істері қоғамның патриоттық иммунитетінің нығаюына ықпал ете алатынына халықтың көзі жетті.
Қалыйма ЖАНТӨРЕЕВА,
Nur Otan партиясы Түркістан облыстық филиалы төрағасы
бірінші орынбасарының міндетін атқарушы