Алматыда қазақтың ұлы ақыны Абай Құнанбайұлының 175 жылдық мерейтойына орай Абай шыңын бағындыру шарасы өтті. Шараны «Жас Отан» Жастар қанатының Алматы қалалық филиалы ұйымдастырды.
Үш найзатастан құралған Абай шыңы 3 600 метр биіктікте қасқайып тұр. Шың басына шыққан жүздеген адам ақынның өлеңдерін оқып, әндерін әуелете шырқады. Ары қарай кәсіби альпинистер тобы 4 010 метр биіктіктегі Абай шыңына көтеріліп, ол жерде Қазақстанның және «Жас Отан» Жастар қанатының туын көкте желбіретті. Шараға қатысып, атсалысқандар арасында партия өкілдері, блогерлер, спортшылар және өзге де ерікті жастар болды.
– Осыдан 20 күн бұрын шілде айында Абайдың 175 жылдығын атап өтуге қандай үлес қосамыз деген ой болған еді. Қазір қарап отырсақ, жастар шартты түрдегі жиналыстардан, кездесулерден шаршады. Сондықтан бұл шараны жаңа форматта, ерекше қылып өткізейік деп келістік. Бұл бір жағынан саламатты өмір салтын қалыптастырса, екінші жағынан ұлы ақынымыздың рухани мұрасын дәріптеудің таптырмас жолы. Біздің ұсынысымызды «Тассай», «Самал» суларын өндірушілер, сондай-ақ қалалық әкімдік пен партия басшылығы да қолдады. Шараға қатысушыларға «Шымбұлақ» та қолдау білдірді. Қатысуға ниет білдіргендер – әртүрлі жастағы қала тұрғындары. Олар тізімге онлайн тіркеу арқылы енді. Жалпы алғанда, шараға 80-ге жуық адам қатысты. Жастар Абай шыңына шығып, «Желсіз түнде жарық ай», «Көзімнің қарасы» әндерін орындаған кезде керемет әсерде болдық, – дейді «Жас Отан» Жастар қанатының төрағасы Мәди Ахметов.
Еске сала кетейік, Президент Қасым-Жомарт Тоқаев ақынның 175 жылдық мерейтойын атап өту туралы ресми Жарлыққа осы жылдың 30 мамырында қол қойған болатын. Алматы жастары мұндай шараларды алдағы уақытта да жалғастыратынын айтты. Олар осындай ерекше форматтағы бастамалар түсініксіз жиын, мәнсіз іс-шара мен стандартты жиналыстардан әлдеқайда пайдалы болатынын дәлелдеді. Тауға шығу шарасынан кейін #Абай_шыңы хэштегі арқылы көптеген қатысушы ұйымдастырушыларға әлеуметтік желіде алғыс білдірді.
Абай ҚАЗБЕКҰЛЫ