Партия алдында жаңа міндеттер тұр

Қазақстанның Тұңғыш Президенті Нұрсұлтан Назарбаевтың төрағалығымен Nur Otan партиясының Саяси кеңесі бюросының отырысы өтті.

Басқосуда партия бағдарламаларын жүзеге асыру барысы және алдағы кезең­дегі жұмыстың басым бағыттары қаралды.

Елбасы Nur Otan партиясының 20 жыл ішінде еліміздің қуатты саяси күшіне ай­налғанын атап өтті.

– Ең қиын жылдары партиямыз халық пен саясаткерлерді бір бағытта жұмыс істеу­ге жұмылдырды. Біз бейбітшілік пен ұлтара­лық келісімді, саяси тұрақтылықты сақ­тадық. Соның арқасында айтарлықтай жетістіктерге қол жеткіздік. Бұл біздің елі­мізге дағдарыс қыспағынан шығуға, ин­вестиция тартуға, мыңдаған жаңа кәсі­по­рын және жұмыс орындарын ашуға, ең бас­тысы, тәуелсіздігімізді сақтауға және ны­ғайтуға мүмкіндік берді, – деді Елбасы.

Нұрсұлтан Назарбаев жаһандық өз­ге­ріс­терге байланысты партия алдында жаңа әрі күрделі міндеттер тұрғанын атап өтті.

– Қазақстан тез дамып келе жатқан ел­дер сияқты «орташа табыс қақпанына» тап болды. Дүниежүзінде орта таптың та­­­бысына қатысты тоқырау бар екенін кө­ріп отырмыз. Теріс жаһандық тренд­тер­дің де ықпалы артып келеді, – деді пар­тия Төрағасы.

Елбасы азаматтардың сұраныстарына да уақтылы жауап беру қажеттігін атап өт­ті.

– Қиындықтарға қарамастан, 2050 жыл­ға дейінгі стратегияда көзделген бас­ты мақсат – озық дамыған 30 елдің қа­та­ры­на кіруді, яғни қазақстандықтардың тұр­мыс сапасын алдыңғы қатарлы елдер дең­гейіне көтеруді ұмытпауымыз керек. Бұ­ған қол жеткізу үшін, ең алдымен, тұ­рақ­тылық, бірлік және барша қаза­қ­стан­дықтардың қажырлы еңбегі қажет. Мұны әр­қайсымыз жете түсінгеніміз жөн. Озық дамыған 30 елдің барлығы да осы жолдан өткен, – деді Тұңғыш Президент.

Нұрсұлтан Назарбаев 2050 жылға дейін­гі дамудың стратегиялық бағдары­ның мақсаттарына қол жеткізу үшін пар­тия тарапынан атқарылып жатқан жұ­мыс­тың басым бағыттарына тоқталды.

– Сондықтан партиямыз, біріншіден, қо­ғамды жұмылдырып, елдің саяси бас­шылығының бірлігін нығайтуы керек. Ішкі бірлік пен келісім болған кезде ғана алға ілгерілеу болады. Екіншіден, бізге нақ­ты партиялық бірегейлік және қатаң тәр­тіп, сондай-ақ атқарушы биліктің жауап­кершілігі қажет, – деді партия Төрағасы.

Елбасы Мәжіліс пен мәслихат сай­лауы­на сапалы дайындалудың маңыз­ды­лығын атап өтті.

– Алдымызда маңызды науқан – Мә­жі­ліс депутаттарының сайлауы бар. Заң­намаға былтыр енгізілген өзгерістерге сәй­кес, мәслихаттардың келесі сайлауы Мә­жіліс сайлауы сияқты алғаш рет пар­тия­лық тізім бойынша өтеді. Біз жеңіске же­туді және ұзақмерзімді саяси көшбас­шы­лықты көздеп отырмыз. Сондықтан ал­дағы сайлау науқанына бүгіннен бастап дайындалуымыз керек, – деді Қазақ­стан­ның Тұңғыш Президенті.

Сонымен қатар Елбасы барлық мүд­делі азаматтарды мемлекеттің өзекті әлеу­меттік-экономикалық проблемаларын ше­шу үшін партияға қосылуға шақырды.

– Біз өз ұсыныстарын айтқан белсенді аза­маттар мен блогерлерді көріп, естіп отыр­мыз. Егер олар шынымен де ел тағ­дыры үшін алаңдайтын болса, ұсынылған идеяларын жүзеге асыру үшін партиямен бірге жұмыс істеуге шақырамыз, – деді пар­тия Төрағасы.

Нұрсұлтан Назарбаев еліміздің өңір­леріндегі тұрғындардың проблемаларын шешу үшін Nur Otan партиясының жұмы­сын жандандыру қажеттігін атап өтті.

– Nur Otan партиясының міндеті – тиім­ді қоғамдық және партиялық бақы-лау ор­нату, халыққа берілген барлық уәде­лерді сапалы орындау. Сондай-ақ «Бес инс­титуционалдық реформаны», партия­ның 2021 жылға дейінгі сайлауалды бағ­дар­­ламасын, Президентіміз Қасым-Жо­март Тоқаевтың бағдарламасын жүзеге асыру. Бұл құжаттардың бәрі қазақ­стан­дық­тардың тұрмысын жақсартуға бағыт­талған, – деді Елбасы.

Сонымен бірге, Nur Otan партия­сы­ның Төрағасы қоғамның партияға деген сенімін арттыру үшін ақпараттық-идеоло­гия­лық стратегияны қабылдау маңыз­ды­лығына баса мән берді.

– Өзекті мәселелер туралы ашық ай­тып, олардың жергілікті жерде шешілуіне ат­салысу керек. Біздің міндетіміз – қо­ғамның сенімін арттыру. Бұл үшін бүкіл қо­ғам­ның, саяси күштердің, бизнестің, зия­лы қауымның, сарапшылар мен аза­мат­тардың диалогы қажет. Қолда бар бар­лық алаңды пайдалануға тиіспіз. Нақ­ты мәселелерді шешуге бағытталған жұ­мыс жүргізу қажет. Біз азаматтарымыздың бо­лашаққа нық сеніммен қарауына жағ­дай жасауымыз керек, – деді Қазақ­стан­ның Тұңғыш Президенті.

Саяси кеңес бюросының отырысында Nur Otan партиясының партиялық тізімі бойынша Парламент Мәжілісі депу­тат­тары­ның мандаттарын Г.Әбдіқалықоваға, Н.Әлімжановқа, Н.Әшімбетовке және Ж.Омарбековаға беру туралы шешім қабылданды.

Отырыс соңында Nur Otan партия­сы­ның Лидері Нұрсұлтан Назарбаев 21 та­мыз­да Үкіметтің, Парламент Мәжілі­сін­дегі партия фракциясының және аймақ бас­шыларының қатысуымен Саяси кеңес­тің кеңейтілген отырысын шақыру ту­ралы қаулыға қол қойды.