Nur Otan партиясының Алматы қалалық филиалының бастамасымен Жетісу ауданында ашылған «Бақытты отбасы» орталығында көпбалалы аналарға көмек беру мақсатында «Мектепке жол» акциясы өтті.
Қайырымдылық шарасына Жетісу ауданының әкімі Мақсат Қиқымов, Nur Otan партиясы Жетісу аудандық филиалы төрағасының бірінші орынбасары Мұрат Омаров, Алматы қалалық мәслихатының депутаттары Асхат Чиликбаев, Қайрат Құдайберген қатысты.
Акцияны ұйымдастырушылар көпбалалы аналарға дастарқан жайып, балаларға мектепке қажетті құрал-жабдықтар мен сөмке тарту етті. Балаларға берілген сөмкелер әрбір мектеп оқушысына арналған қажетті кеңсе тауарларымен – қаламсауыт, қаламсап, қарындаш, альбом, күнделіктер, дәптерлер және басқа да заттармен толтырылған.
Іс-шарада Жетісу ауданының әкімі Мақсат Қиқымов қайырымдылық акциясын ұйымдастырған жанашыр жандарға алғысын білдірді.
– «Мектепке жол» республикалық қайырымдылық акциясы қыркүйек айының аяғына дейін жалғасады. Іс-шараның мақсаты – аз қамтылған және көпбалалы отбасылар, жетім балалар мен ата-анасының қамқорлығынсыз қалған балаларға жаңа оқу жылына дайындық кезеңінде көмек көрсету, әлеуметтік себептер бойынша балаларға бармауының алдын алу. Акция кезінде әлеуметтік қолдауды қажет ететін барлық оқушыларға көмек көрсетіледі. Жыл сайын өткізіліп жатқан қайырымдылық шарасына демеушілер мен меценаттар тарапынан көрсетілген көмек пен қолдаудың үлесі зор. Қазіргі уақытта акцияны жоғары деңгейде өткізу үшін жүйелі жұмыстар атқарылып жатыр, – дейді Мақсат Қиқымов.
Бүлдіршіндерге қуаныш сыйлаған Алматы қалалық мәслихат депутаттары мектепке дайындалып жүрген оқушыларға сәттілік тілеп, жыл сайын мейірім мен шуағын төгетін акция оқу жылы басталғанша көпшілік көмегімен жоғары дәрежеде өтетініне сенім білдірді.
Жазира ДАРХАНҚЫЗЫ