Мемлекет басшысы Қасым-Жомарт Тоқаев 2019 жылғы 20 мамырда мемлекеттік органдардың басшыларымен болған сыбайлас жемқорлыққа қарсы іс-қимыл жөніндегі кеңесте сыбайлас жемқорлыққа қарсы саясаттың негізгі бағыттарын белгілеп, қоғам дертінің тамырына балта шабудағы іс-қимыл мәселелерінде өңірлердің рөлін күшейту қажет екенін айрықша атап өтті.
Мемлекет басшысының осы тапсырмасын негізге алған Жетісу жеріндегі нұротандықтардың мұрындық болуымен «Сыбайлас жемқорлық – қоғам дерті» тақырыбында семинар ұйымдастырылды. Іс-шараға Сүйінбай атындағы Алматы облыстық филармониясы, І.Жансүгіров атындағы мәдениет сарайы және Алматы облысы мамандандырылған күзет қызметі басқармасы ұжымдары қатысты.
Жиынды Алматы облысының Мәдениет, архивтер және құжаттама басқармасының басшысы Мәрлен Көлбаев жүргізді. Отырыс барысында Nur Otan партиясы Алматы облыстық филиалы төрағасының бірінші орынбасары Ғалиасқар Сарыбаев, ҚР Сыбайлас жемқорлыққа қарсы іс-қимыл агенттігінің Алматы облысы бойынша департаменті сыбайлас жемқорлықтың алдын алу және парасаттылық басқармасының басшысы Асқар Садықов, Алматы облысы мамандандырылған күзет қызметі басқармасының бастығы, полиция полковнигі Еділ Тлеуберлинов өз салалары бойынша жемқорлықпен күрес жұмысының нәтижелері туралы баяндама жасады.
Алматы облысында ағымдағы жылдың басынан бері мемлекеттік қызметте заңдардың орындалуын қадағалауға байланысты аудит жүргізіліпті. Аудит қорытындысы бойынша 163 талап-ескерту беріліп, оның 154-і орындалған. Сонымен бірге, 252 әкімшілік іс қозғалып, 21 млн 096 мың теңге бюджетке қайтарылған. Аудиторлық алдын алу шараларына сәйкес 146 лауазымды тұлға жауапқа тартылып, 99 ескерту, 36 сөгіс, 10 қатаң сөгіс беріліп, 1 лауазымды тұлға жұмыстан босатылған. Бұл ақпараттарды Сыбайлас жемқорлыққа қарсы іс-қимыл агенттігінің Алматы облысы бойынша департаменті Сыбайлас жемқорлықтың алдын алу және парасаттылық басқармасының басшысы Асқар Садықов айтты.
Ал жемқорлықпен күрес жұмысында партия жанындағы қоғамдық кеңестің қызметі туралы Алматы облыстық партия филиалы төрағасының бірінші орынбасары Ғалиасқар Сарыбаев баяндады. Оның айтуы бойынша, сыбайлас жемқорлыққа жол берген және партия жарғысына сай келмейтін жат қылықтар көрсеткен партия мүшелерінің мәселелері аумақтық партия филиалдарының Саяси кеңесі бюросы және партиялық бақылау комиссияларының отырыстарында қаралған. Тексеріс нәтижесінде, сыбайлас жемқорлық әрекеттері үшін жауапқа тартылған 7 адам партия қатарынан шығарылып, басқа да қылмыстық әрекеттері үшін заң алдында жауапқа тартылыпты. Сондай-ақ сыбайлас жемқорлыққа қарсы өңірде арнайы мобильді топтар құрылып, 547 ұжымды аралап шыққан.
«Азаматтардың сыбайлас жемқорлыққа қарсы күресу әрекеттері жоғары бағаланады, ынталандыру шаралары қолданылады. Бұл дегеніміз – сыбайлас жемқорлыққа қарсы бүкіл халықты жұмылдырудың нақты көрінісі болып отыр» дейді семинарды ұйымдастырушылар.
Болат АБАҒАН,
Алматы облысы