Nur Otan партиясының саяси кеңесі партия бағытын ғана емес, ел дамуына үлес қосатын факторларды атап берді. Қостанай облыстық мәслихатының Nur Otan партиясы фракциясының жетекшісі Екатерина Смышляева саяси кеңес пен депутаттық мандаттың арасындағы байланыс жайын айтты. Депутат сөзінше, халық пен партияны байланыстыратын – сенім.
Партияның саяси кеңесі, жиналыстар – маңызды шара. Өйткені онда қоғамның түйткілді мәселелері талқыға түседі. Елбасы айтқандай, кішкене мәселе дейтін ұғым жоқ. Барлығы жіті қадағалауда болуы керек. Бұл партия құрылымына, модернизациясына әсер етеді. Партияның аймақтық филиалдары осы бағытта жұмыс істейді.
Еліміздің әр өңірінде 33 фракция депутаты бар. Олар табанды түрде белсенді жұмыс істейді. Осыдан-ақ басты назар фракцияға аударылады. Елбасы фракцияның жұмыс істеу формасын өзгерту керегін айтты. Бұл парламент пен өңірлік фракцияға қатысты. Тұңғыш Президентіміз айтқандай, сайлаушыларға жақындай түсеміз. Бұрындары сайлаушылар бізбен байланысу үшін кезекке тұратын. Қазір бәрі дистанционды түрде жүзеге асады. Қазір Facebook, WhatsApp басқа да әлеуметтік желі арқылы пікір білдірушілер көп. Әр сауал жауапсыз қалмауы керек.
Nur Otan-ның ерекшелігі – инфрақұрылымында. Әртүрлі әрі мықты. Кадрлық және материалдық базасы бай. Біз барлық өңірде нәтижелі жұмыс істейміз. Қоғам тарапынан сын болуы тиіс. Сын болған жерде өсу бар. Әрбірінің үні Nur Otan-ға жетуі керек. Партияның артықшылығы – тыңдай білуінде. Келешекті бағдарлай алатынында.
Біз қоғамға әр қырынан назар саламыз. Партиялық қадағалау күшейеді. Жан- жақты жұмыс жүргізуді негізге аламыз. Мәселе туындаса екі тарапты да тыңдаған дұрыс. Бұл – партия этикасы. Біз бәріне объектив түрде қараймыз.
Менің депутаттық жұмысымның барысы – төменнен жоғары қарай. Алдымен, ауылдық жердегі мәселеге мән беремін. Артынан аудан халқының арыз-шағымын қараймыз. Содан кейін қаладағы кем-кетікті түзеуге тырысамыз. Бәріне тыңғылықты талдау жүргіземіз. Арнайы схема бойынша жүріп отырамыз.
Құрылымның сәтті жұмыс істеуі үшін кездесу өткізіп, халықты тыңдаймыз. Көпшілігі адам саны 1000-нан асуы керек, саны толуы тиіс дейді. Меніңше, 2 адаммен сөйлесіп те, түйінді тарқатуға болады. Кері байланыс кезінде 2 000 адам айтпаған мәселе талқылануы мүмкін. Бастысы, мәселені бірге шешуге тырысқан жанның ниетінде.
Мендегі күн қалай басталады? Алдымен, ел мен жаһан жаңалығын оқимын. Сосын, әлеуметтік желідегі өткір тақырыптарды қараймын. Міндетті түрде. Ол маңызды болмаса, қоғамда мұнша талқылауға түспейтін еді. Шешу амалы қандай, мұндай жағдай қайталануы мүмкін бе, осы жағын ойланамын.
Қоғамдық қабылдау – фракцияның негізгі күші. Жылына қабылдау келушілер саны 7000-нан асады. Біз әрбір мәселеден анализ картасын жасаймыз. Мысалы, үй мәселесі бойынша 200 сұрақ, жәрдемақы бойынша 150, медициналық көмек бойынша 5 сұрақ. Осылайша, анализ картасы дайын болады. Нақты қай салада жұмыс күшін жұмылдыру керегі айқын көрініп тұрады.
Маңыздысы – халық сеніміне ие болу. Сенімге кіру үшін тыңдай білу керек. Мұның қазіргі жастарға да қатысы бар. Қоғам жастарға сеніммен қарауға қорқады. Менталитет әсер етеді. Ықпалы бар адам айтса, салмақты көрінеді. Белгілі бір фактор бойынша бұл дұрыс болар. Алайда жастардың партияда, қоғамда қалыптасуы үшін сенім артуымыз қажет. Жаңадан бастайтын адамға бәрі қиын. Біз үйретпесек, сенім артпасақ жас толқын жігері жасиды. Олардың үлес қоссам, дамысам, жетістікке жетсем деген рухын көтеруіміз керек. Мәжілісті, мәслихатты партиялық тізіммен сайлауды мандат алу емес, халыққа бір табан жақындау деп қабылдаған жөн.
Партия – бұл тәртіп. Партия тапсырма беретін орталық. Партия – платформа. Көрсеткіш, қадағалау, нәтиже. Сондықтан партия артқан сенімді орындау – міндетіміз.
Айбике ЖАНАСЫЛ