30 шілде күні АҚШ-тың Флорида штатынан Марсқа Persversance зерттеу ровері бар Atlas V зымыран тасығышы ұшырылды. Бір қызығы, бортта қазақстандық әнші Димаш Құдайбергеннің есімі жазылған отырғызу талоны болды, деп хабарлайды sputniknews.kz.
Бұл жерде әншінің өзі Марсқа ұшқан жоқ, бірақ ол Марсты ашу тарихының бір бөлігіне айналды.
"Флорида штатындағы Кеннеди ғарыш орталығы Қызыл ғаламшарға ұшар алдындағы кері есептеуді бастады. 30 шілдеде таңертеңгі сағат 7:50-де жаңа астробиолог Марста ежелгі тіршілік белгілерін іздеуге жеті айлық сапарға аттанады. Димаш Құдайберген атындағы отырғызу талонына ұсынысты әртүрлі елдер, соның ішінде АҚШ, Түркия, Ресей берген", – деп жазды Димаш өзінің Instagram парақшасында.
РИА Новостидің хабарлауынша, Флорида Persversance зерттеу ровері бар Atlas V зымыран тасығышы АҚШ-тың шығыс жағалау уақыты бойынша сағат 07:50-де (Нұр-Сұлтан уақытымен 17:50) ұшқан.
НАСA ғылыми бағдарламасының жетекшісі, агенттік басшысының орынбасары Томас Зурбухеннің айтуынша, ұшырылым қалыпты режимде өтті және мамандар құрылғымен тығыз байланыста. НАСА мамандары егер сәтсіз ұшырылған жағдайда келесі әрекет тек 26 айдан кейін жасалатынын мәлімдеді.
Зерттеу ровері Қызыл ғаламшар орбитасына 2021 жылы 18 ақпанда жетеді деп жоспарланған. Ровер құрылғысы жеті ғылыми зерттеу құралымен жабдықталған, оның ішінде басқа ғаламшардың үстінен бірінші рет ұшатын тікұшақ та бар. Роверде жиырмаға жуық камера мен қоршаған ортаны зерттеуге арналған құралдар орнатылған. Сонымен қатар ровер жинағының құрамында Марс атмосферасынан алғаш рет оттегін алуға тырысатын эксперименталды Moxie құралымен қамтамасыз етілген.
