Парламент Сенатының депутаты Айгүл Қапбарова атаулы әлеуметтік көмектің арқасында өз кәсібін ашып, жеке бизнесін бастаған көпбалалы ананың отбасына арнайы келді. Алты баланың анасы Тілләгүл Қарсыбаева Шымкент қаласындағы Еңбекші ауданының Көксай елдімекенінде тұрады.
Ол шағын тігін цехын ашыпты. Сенатор Айгүл Жарылқасынқызы өз бизнесін дөңгелетіп отырған анаға алғысын айтып, ризашылығын білдірді. «Әйел-ана бір қолымен бесікті, екінші қолымен әлемді тербетеді. Сіздің жасап отырған жұмысыңыз өзгелерге үлгі етуге тұрарлық. Мемлекет атаулы көмекті халықтың әлеуметтік жағдайын көтеру үшін беріп отыр. Оны сіз сияқты тиімді пайдаланғандар осылайша өз кәсібін бастауда. Сіз өз кәсібіңізді бастап қана қоймай, бала тәрбиесіне де үлгеріп, ұрпағыңызға нан табудың оңай жолмен келмейтінін ұғындырып жатырсыз. Біз сіздерді қолдаймыз», – деді ол.
Тілләгүл Тасболатқызы 2017 жылы «Өрлеу» бағдарламасымен мемлекеттен 290 мың теңге алып, тігін машинасы мен мата сатып алған екен. Алғашқы жұмысты құрақ құрап, көрпе-жастық тігуден бастайды. Кейін міне, тағы тігін машинкасын сатып алыпты. Бүгінде Шымкент қаласынан бөлек, Алматы, Нұр-Сұлтан және Ақтөбе қалаларынан да тапсырыс қабылдап отыр. Кездесу барысында сенатор Айгүл Қапбарова бүгінде мемлекет тарапынан көпбалалы аналарға, жалпы «жұмыс істеймін, кәсіп бастаймын» деген жандарға көптеген қолдау шарасы бар екенін атап өтті.