Сингапурлық Kinder World International Group Ltd компаниясы Шымкент қаласында халықаралық білім беру кластерін салмақ. Аталған орталықтың құрамына балабақша, халықаралық мектеп пен колледж кіреді.
Аталған жобаны талқылау мақсатында Шымкент әкімі Ерлан Айтаханов пен сингапурлық компанияның төрағасы Рики Тэн кездесті.
Тараптар білім орталығының болашақ әлеуетін талқылады.
Е.Айтаханов мегаполис мәртебесін жуырда алған Шымкент үшін жаңа оқу орындары аса маңызды екенін айтып, қаланың дамуына зор үлес қосатынына сенім білдірді.
Жалпы құны шамамен 23-25 млн АҚШ доллары болатын жобаны сүйемелдеумен Kazakh invest АҚ айналыспақ.
6 айдан 6 жасқа дейінгі 600 балаға лайықталған балабақшада жабық ойын алаңшалары мен бассейн қызмет көрсетеді. Балабақшада балаларды шет тілдеріне, оқу мен санауға, қоғамтану, музыка, би мен бейнелеу өнеріне үйретеді. Мұнан бөлек, 3-тен 12 жасқа дейінгі балаларға арналған байыту орталығында жасөспірімдер ғылыммен, технологиялармен, инженериямен, математикамен, робототехникамен және AR/VR жүйесімен тереңінен танысады.
Ал халықаралық мектепте дәстүрлі пәндерден басқа бағдарламалауға, робототехникаға және 3D баспаға арналған факультативтік сабақтар өтеді. Сондай-ақ АҚШ-та және басқа да елдерде оқитын студенттердің жазғы алмасу бағдарламалары жұмыс істейді.
Айта кету керек, Kinder World International Group Ltd компаниясының білім беру кластері бүгінде Австралия, Вьетнам, Малайзия елдерінде табысты іске асуда.
Е.МҰРАТБЕК,
Шымкент қаласы